Autoritetet e Maqedonisë thonë se dyshojnë se një 56 vjeçar nënshtetas i Britanisë ka vdekur nga virusi Ebola por nuk janë në gjendje ta konfirmojnë deri sa të mbërrijnë rezultatet nga Gjermania.
Jovanka Kostovska nga Komisioni për Sëmundjet Infektive i tha gazetarëve të enjten në darkë se një nënshtetas britanik ka vdekur sot në Shkup, ndoshta nga Ebola.
Ajo tha se nuk mund të konfirmojë nëse ky person ka vdekur nga ebola për shkak se simptomat e tij janë gjithashtu të ngjashme me sëmundje të tjera fatale. Rrjedhimisht nuk është në gjendje të konfirmojë shkakun e vdekjes para se të mbërrijnë nga një laborator në Gjermani rezultatet, gjë që pritet të ndodhë pas 48 orësh.
Çdokush që besohet se ka qenë në kontakt me personin e dyshuar për ebola është vendosur në izolim. Policika ka bllokuar hyrjen e hotelit ku po qëndronte nënshtetasi britanik si dhe hyrjen e Klinikës së Sëmundjeve Infektive.
Sipas kolegëve të personit të ndarë nga jeta, ai nuk ka udhëtuar në asnjë vend me rrezik Ebole. Sipas informacioneve zyrtare ai hyri në Maqedoni më 2 tetor nga Britania e Madhe. Përgjatë tri ditëve të fundit ai vuante nga dhimbje stomaku dhe ethe. Ai qe në krevat dhe nuk pati dalë nga hoteli për tri ditë.
Sot në orën 3 të pasdrekes një ambulancë u thirr dhe ai u dërgua në spital. Ai vdiq një orë e gjysmë më vonë. Mjekët po përkujdesen aktualisht për kolegët e tij.
Zyrtarët më të lartë të mjekësosë thanë se shpërthimi i Ebolës në Afrikën Perëndimore është një krizë e paparë që nga shpërthimi i HIV/Aids.
Ebola filloi në Guinea dhe që nga ajo kohë është përhapur në vendet e Afrikës Perëndimore duke shkaktuar panik për një epidemi mbarëbotërore.
Sëmundja është aktualisht e pamjekueshme dhe shpërndahet nga lëngjet e trupit me simptoma fillestare të tilla si ethe, dhimbje muskujsh, dobësi dhe dhimbje koke, të cilat sjellin mosfunksionimin e organeve të brendshme dhe vdekje.
Rreth 90 për qind e të infektuarve me këtë virus raportohen të vdekur. Deri tani janë numëruar 3,860 viktima, shumica në Afrikën Perëndimore.
Më shumë se 200 mjekë e infermierë janë mes viktimave.
