Rezultatet e analizave të ardhura nga Gjermania tregojnë se nënshtetasi britanik, i cili vdiq në Maqedoni të enjten, nuk ka qenë i infektuar nga virusi Ebola.
Jovanka Kostovska, nga Komisioni për Sëmundjet Infektive i Maqedonisë, deklaroi të shtunën se rezultatet nga një laborator në Gjermani treguan se britaniku Colin Jeffrey, vdekja e të cilit të enjten shkaktoi panik mbi përhapjen e Ebolës, nuk ka qenë i infektuar me virusin e frikshëm.
“Edhe pse ne ishim të bindur se virusi Ebola nuk ishte shkaktari i vdekjes, ishim të detyruar të reagonim sipas protokolleve ndërkombëtare për të tilla sëmundje të rrezikshme”, tha Kostovska.
Të premten, Kostovska theksoi publikisht se alarmi i dhënë prej saj për Ebolën vinte si pasojë e protokollit ndërkombëtar për këtë rast dhe jo për ndonjë dyshim të arsyeshëm për rastin në fjalë.
Autoritetet thanë se 35 personat që ishin vendosur në karantinë u lanë të lirë të shtunën. Njëzet e pesë prej tyre, përfshirë dhe një foshnjë, ishin vendosur në karantinë në hotelin Super 8, ku Jeffrey qendroi përpara se t’i përkeqësohej gjendja shëndetësore.
Dhjetë përsonat e tjerë, të cilët kishin pasur kontakte me të ndjerin, shumica personel shëndetësor, u mbajtën të izoluar për dy ditë në Klinikën e Sëmundjeve Infektive.
Shkaku i vdekjes së britanikut do të bëhet i ditur pas zhvillimit të autopsisë.
Më herët gjatë javës, një infermiere spanjolle u bë personi i parë i cili infektohej jashtë territorit të Afrikës Perëndimore.
Ekspertët e mjekësisë e kanë përshkruar përhapjen e Ebolës në Afrikën Perëndimore të pakrahasueshme me asnjë sëmundje tjetër që nga koha e emergjencës së HIV/Aids.
Ajo filloi në Guine dhe që atëherë është përhapur në të gjithë vendet e tjera të Afrikës Perëndimore, duke shkaktuar frikë mbi mundësinë e një epidemie mbarëbotërore.
Për këtë sëmundje nuk ka trajtim dhe ajo transmetohet përmes lëngjeve të trupit, duke shfaqur si simptoma të para temperaturë, dhimbje muskujsh, dobësi dhe dhimbje koke, të cilat pasohen me dëmtim të organeve të brendshme dhe vdekje.
Rreth 90 për qind e atyre që janë infektuar nga virusi janë raportuar të vdekur. Deri tani, më shumë se 3,860 individë kanë vdekur, kryesisht në Afrikën Perëndimore. Më shumë se 200 profesionistë të shëndetësisë janë ndër viktimat e regjistruara.
