Zyra e shtypit e këshillit të ministrave ka njoftuar se vizita e kryeministrit Edi Rama në Serbi është shtyrë për në 10 nëntor pas incidenteve të dhunshme në ndeshjen kualifikuese të EURO 2016 midis Serbisë dhe Shqipërisë.
Vendimi për shtyrjen e vizitës që ishte planifikuar për më shumë se një vit u morr pas një bisedë telefonike të Ramës me kryeministrin e Republikës së Serbisë, Aleksandër Vuçiç, pasditen e së dielës.
“Mes dy kryeministrave mbeten mosmarrëveshje të qarta lidhur me gjithë sa ndodhi, por ata ranë dakord që nuk duhet dhe nuk do ta humbin mundësinë për t’u takuar e për të punuar së bashku në funksion të stabilitetit rajonal, si edhe për të çelur një faqe të re në marrëdhëniet politike dhe ekonomike mes dy vendeve,” thotë njoftimi.
“Prandaj, ata u morën vesh që të vazhdojnë dialogun e rëndësishëm që kanë nisur, si edhe për të siguruar që procesi i filluar në Berlin në 28 gusht, të shkojë përpara përmes punës për përmirësimin e marrëdhënieve ndërmjet vendeve të tyre, rajonit dhe Europës si e tërë,” ai shtoi.
Të dy kryeministrat ranë dakord që takimi i planifikuar midis tyre të mbahet në Beograd më 10 nëntor.
Skenat kaotike në ndeshjen e futbollit mes Serbisë dhe Shqipërisë, e cila u ndërpre, krijuan një prolog të pakëndshëm për vizitën e kryeministrit të Shqipërisë në Beograd.
Pasi një dron fluturoi mbi stadium duke mbajtur një hartë të Shqipërisë së Madhe, përleshjet filluan në fushë dhe disa prej lojtarëve shqiptarë u sulmuan nga tifozët serbë që zbritën në fushë.
Ndeshja e parë e futbollit mes Shqipërisë dhe Serbisë u ndërpre në minutën e 41. Rezultati qe barazim zero me zero në këtë kohë.
UEFA tha se komisioni i saj i disiplinës do të vendosë më 23 tetor nëse do të duhet të ndëshkojë skuadrat.
Asnjë kryeministër shqiptar nuk e ka vizituan Beogradin që nga viti 1946, pak pas përfundimit të Luftës së Dytë Botërore.
Marrëdhëniet mes Serbisë dhe Shqipërisë kanë qenë tradicionalisht të varfra. Kur Shqipëria shpalli pavarësinë nga Perandoria Osmane më 1912, Serbia – e cila kërkonte akses direkt në detin Adriatik – luftoi që të sigurohej që Shqipëria të kishte sa më pak territor që të qe e mundur.
Me mbështetjen e Rusisë, ajo mori të gjithë ish provincën osmane të Kosovës, të cilën shqiptarët e deshën për ta përfshirë në vendin e tyre të ri, për shkak se shumica e popullsisë qe shqiptare.
Fati i Kosovës ka qenë burim i mosmarrëveshjeve të thella mes dy kombeve që nga ajo kohë. Edhe sot, shumë serbë mbeten thellësisht të trishtuar për humbjen e Kosovës, e cila shpalli pavarësinë në vitin 2008.
