Prokurorja e EULEX Maria Bamieh dhe gjykatësi Francesco Florit folën në detaje në programin televiziv Jeta në Kosovë të BIRN mbi akuzat për korrupsion që kanë tronditur misionin e Bashkimit Europian për Sundimin e Ligjit në Kosovë.
Prokurorja e pezulluar Maria Bamieh, e cila këtë javë akuzoi ish kolegun e EULEX, gjykatësin italian Francesco Florit, se ka marrë 300 mijë euro ryshfet për të shpallur të pafajshëm një njeri të akuzuar për vrasje dhe për kërkimin e një ryshfeti tjetër kundër një zyrtari të qeverisë së Kosovës, foli gjerësisht në programin e BIRN të enjten në darkë mbi arsyen se pse vendosi të shkojë në publik.
Ajo kritikoi EULEX, duke thënë se nuk kishte llogaridhënie dhe çdokush qe duke e transferuar fajin nga Prishtina në Bruksel. “Ata besojnë se janë si Zotat.”
Bamieh tha se zyrtarët e EULEX injoruan kërkesat e saj për të hapur një hetim mbi akuzat dhe në vend të kësaj, e pezulluan atë. Ajo akuzoi se emri i gjykatësit shfaqej shpesh në transkriptet e bisedave telefonike të përgjuara gjatë hetimit të saj.
Gjykatësi Florit mohoi energjikisht se ka marrë një ryshfet.
I pyetur nëse ai është nën hetim, Florit tha: “Që të flasim hapur, atë që di është ajo që ka dalë në gazetat e Kosovës.”
Ai tha se ka pyetur prokurorinë nëse ka patur një hetim dhe i është thënë se “është vetëm një hetim paraprak dhe se unë nuk jam i regjistruar formalisht në regjistër.”
Më herët të enjten, Gabriele Meuçi, kreu i misionit të Bashkimit Europian për sundimin e ligjit në Kosovë, tha në një konferencë për shtyp në Prishtinë se EULEX po heton akuzat e prokurores së pezulluar Bamieh.
Meuçi hodhi poshtë pretendimin e Bamieh që EULEX nuk ka pranuar të hetojë akuzat e saj.
“Ato nuk janë injoruar,” tha ai.
Shikoni intervistën e plotë më poshtë.
