Rreth 3700 minatorë do të mund të aplikojnë për pension në moshën 55 vjeçare, por do të humbasin trajtimin financiar aktual ndërsa minatorëve në punë do t’u rriten sigurimet.
Qeveria shqiptare ka vendosur të japë pension në një moshë më të re për minatorët, por ndërkohë pensionistëve të rinj do t’u zbriten nga pensioni disa përfitime financiare që sakaq i marrin ndërsa minatorëve të rinj do t’u rriten sigurimet shoqërore që u mbahen aktualisht nga paga në masën 5 për qind më shumë se sa pjesa tjetër e popullsisë. Këto dy mekanizma duket se qeveria ka përzgjedhur për të reduktuar faturën financiare të trajtimit me pension të parakohshëm të punonjësve të sektorit minerar.
Projektligji “PENSIONET E PUNONJËSVE QË KANË PUNUAR NË MINIERA, NË NËNTOKË” është duke u diskutuar aktualisht në Kuvendin e Shqipërisë dhe pritet të miratohet së shpejti. Projektligji parashikon që minatorët të dalin në pension në moshën 55 vjeç, me kushtin që të kenë përfunduar 30 vite punë me sigurime shoqërore nga të cilat, 12.6 vite duhet t’i kenë kaluar nën tokë. Pjesa tjetër e popullsisë del në pension në moshën 60 vjeç për gratë dhe 65 vjeç për burrat dhe me jo më pak se 35 vite punë. Mosha e pensionit është në rritje bashkë me vitet minimale të pensionit.
Sipas vlerësimeve të Ministrisë së Mirëqënies Sociale dhe Rinisë, 3840 minatorë do të përfitojnë me një kosto të përgjithshme prej 793 milionë lekë. Por 3680 persona do të pakësohen nga përfitimi i trajnimit të veçantë financiar, një skemë e ndihmës për minatorët e miratuar në vitin 2009, duke i kursyer qeverisë 435 milionë lekë. Ndërkohë, mbi minatorët aktualë ligji i propozuar e rrit masën e kontributeve të sigurimeve shoqërore në krahasim me pjesën tjetër të popullsisë me 5 për qind mbi pagën bruto, të cilat do të duhet t’i mbahen 3 për qind punëdhënësit dhe 2 për qind punëmarrësit. Nga ky taksim i ri qeveria shpreson të arkëtojë 48 milionë lekë në vit.
Në total, nga dhënia e pensionit në moshën 55 vjeç për minatorët, qeveria vlerëson se do të duhet të shpenzojë neto 310 milionë lekë në vit.