Gjatë këtij viti humbjet e energjisë elektrike në rrjet janë reduktuar, por ato vijojnë të mbeten në nivele stratosferike dhe shumë më të larta se sa minimumet historike.
Gjatë gjashtëmujorit të parë të këtij viti humbjet e energjisë elektrike në rrjet janë reduktuar me të njëjtën periudhë të një viti më parë ndërsa energjia e faturuar është rritur, por humbjet mbeten gjithsesi shumë më të larta se sa mesatarja historike e dekadës së fundit. Sipas bilancit të energjisë elektrike të publikuar nga Instituti i Statistikave, gjatë gjashtëmujorit të parë të këtij viti, humbjet u reduktuan në 38.4 për qind të energjisë së hedhur në rrjet, nga afro 42 për qind që qenë në të njëjtën periudhë të një viti më parë.
Por humbjet e këtij viti janë gjithsesi më të larta se sa mesatarja e humbjeve të regjistruar në periudhën 2000-2003, e cila ka qenë 37.7 për qind. Humbjet vijojnë të mbeten jashtëzakonisht të larta në krahasim me minimumin historik të shënuar në vitin 2011 kur qenë në masën 30 për qind.
Sa i përket pyetjes nëse këto reduktime humbjesh janë kryer me shpejtësi mbresëlënëse, historia tregon se në vite të caktuara, humbjet janë reduktuar me shpejtësi më të madhe se sa kjo e regjistruar në gjashtëmujorin e parë të këtij viti.
Si pasojë e reduktimit të humbjeve, energjia e faturuar ndaj konsumatorit familjar dhe pjesës tjetër të konsumatorëve është rritur, siç shihet edhe në grafik.
