Raporti i ri i Komisionit Europian ka paralajmëruar Rumaninë se rrezikon një deficit buxhetor më të lartë vitin e ardhshëm nëse nuk ndryshon tani kursin.
Komisioni Europian tha se pritet që deficiti buxhetor i Rumanisë për këtë vit të arrijë në 2.1 për qind të PBB, dhe të rritet në 2.8 për qind për vitin e ardhshëm, nëse qeveria nuk rrit taksat apo nëse nuk ul shpenzimet e tanishme.
“Për 2015-ën, deficiti i Rumanisë projektohet të rritet në 2.8 për qind të PBB ose rreth 2.26 miliard euro sipas supozimit të mosndryshimit të politikave,” thotë parashikimi i vjeshtës.
Komisioni thotë se qeveria duhet të ulë shpenzimet vitin tjetër në mënyrë që të kompensojë rënien e të ardhurave nga ulja e kontributeve shoqërore të punëdhënësve, taksave të ndërtesave dhe taksave të akcizës.
Komisioni gjithashtu vlerëson se ekonomia e Rumanisë do të rritet vetëm me 2.4 për qind vitin e ardhshëm, krahasuar me vlerësimin 2.6 për qind të pranverës.
Gjithsesi, rritja e konsumit duhet të vazhdojë t’i japë zhvillim ekonomisë, teksa pagat ngrihen dhe normat e interesit bien.
Kreditë do të bëjnë një rikthim të vogël në 2015, pas dy viteve evolucioni negativ. Kontributi i eksporteve në ekonominë kombëtare pritet të bjerë në gjysmën e dytë të vitit dhe do të bëhet negativ në dy vitet e ardhshme, teksa importet pritet të rriten në shkallë më të shpejtë se eksportet.
Qeveria e qendrës së majtë të Kryeministrit Victor Ponta nuk ka komentuar ende mbi raportin e Komisionit Europian.
Të mërkurën, Ponta lajmëroi vetëm se Rumani “i kishte mbyllur dhjetë muajt e parë të këtij viti me një bilanc pozitiv të buxhetit, për herë të parë në 25 vite,” kryesisht si rezultat i shkurtimeve në investime.
Buxheti i të ardhurave për periudhën nga janari në tetor u mbyll me 39.6 miliard euro, ndërsa shpenzimet arritën 39.6 miliard euro, sipas Pontas.
Ekonomia e Rumanisë vazhdon të përcjellë sinjale të përziera. Në shtator, Instituti i Statistikave lajmëroi një rritje sezonale në aktivitetin industrial ndihmoi në rritjen e ekonomisë me 2.4 për qind në vit për gjashtë muajt e parë të 2014.
Megjithatë, në bazë tremujore, PBB ra me 1.0 për qind në periudhën prill-qershor, bazuar në të dhënat sezonale, pas një tkurrje me 0.2 për qind nga tremujori i mëparshëm.
Teksa qeveria vuri re një “trend pozitiv”, disa ekspertë i qëndruan idesë se ekonomia ishte pranë hyrjes në recesion ‘teknik’ për shkak të rënies së shpenzimeve qeveritare dhe uljes me 10 për qind të investimeve të huaja direkte, FDI.
Rumania përjetoi një recesion të thellë në vitin 2009 dhe 2010, ndërsa aktiviteti tregtar u tkurr me 9.1 për qind. Ekonomia ra sërish në 2012. Në 2013, ekonomia e vendit u zgjerua me 3.5 për qind.
