Studentët dhe pedagogët protestojnë kundër vendimit të Qeverisë, që i nxjerr ata jashtë godinës së Fakultetit me 60 vjet histori.
Historia 60-vjeçare e fakultetit të Gjeologjisë dhe Minierave në Tiranë rrezikon të zhbëhet, pas vendimit të Këshillit të Ministrave për t’ia kaluar godinën Gjykatës së Lartë. Vendimi i marrë në mbledhjen e 5 Nëntorit nga qeveria shqiptare është pritur me protesta nga studentët dhe pedagogët e Fakultetit, të cilët ankohen se janë gjendur përballë një fakti të kryer.
Sipas vendimit të qeverisë, godina e Fakultetit të Gjeologjisë dhe Minierave, me të gjitha hapësirat e saj kalon nga administrimi i Ministrisë së Arsimit dhe i Universitetit Politeknik në atë të Ministrisë së Drejtësisë. “Objekti do të përdoret në funksion të qëllimit dhe veprimtarisë së Gjykatës së Lartë”,-thotë VKM-ja.
Por studentët dhe pedagogët kundërshtojnë të zhvendosen dhe i kërkojnë qeverisë të ndryshojë vendimin. “Mënyra se si është marrë ky vendim është alarmante. Nuk jemi konsultuar dhe as vënë në dijeni më parë se duhet të zhvendosemi”,-i tha BIRN-it pedagogu i Gjeologjisë Inxhinierike, Redi Muçi. Ai pohon se stafi pedagogjik dhe studentët e këtij fakulteti janë informuar nga media se duhet të lëshojnë godinën, pa u konsultuar më parë nga drejtuesit e fakultetit apo përfaqësuesit e Ministrisë së Drejtësisë.
Mëngjesin e së enjtes, studentët dhe pedagogët kanë ndërprerë mësimin dhe kanë nisur një protestë kundër vendimit të qeverisë. Fillimisht, ata kanë protestuar para Fakultetit të tyre dhe më pas kanë shkuar tek Korpusi, ku u janë bashkuar të tjerë studentë dhe pedagogë.
Pedagogët thonë se kërkojnë prej vitesh ambiente shtesë për të realizuar në kushte normale mësimin, por gjithë sa po marrin në këmbim është zhvendosja e detyruar. “Nuk na është thënë ende se ku do të na çojnë. Zv.ministri i Arsimit, Arbi Mazniku erdhi në takim me dekanin dhe rektorin dhe premtoi se nuk do të na nxjerrin jashtë, pa u gjendur një ambient tjetër për ne. Por ne kërkojmë që të na lënë në punën tonë”,-shton pedagogu Muçi.
Fakulteti i Gjeologji Minierave ka një histori 60-vjeçare të lidhur me godinën me arkitekturë të veçantë, të shtrirë në zemër të Parkut të Tiranës. Por Këshilli i Ministrave ka vendosur tashmë që në këtë godinë të zhvendoset Gjykata e Lartë. Nuk dihet ende se çdo të bëhet me ambientet aktuale ku kryen funksionet kjo gjykatë.
Por studentët dhe pedagogët thonë se nuk do të heqin dorë, derisa ky vendim të anulohet. Ata kanë paralajmëruar një protestë të dytë mëngjesin e së premtes me sloganin: Fakultet dhe industri, jo gjykata pa drejtësi”.
