Dy anëtarë të lartë të Parlamentit Europian kanë thënë se nëse akuzat për korrupsion të bëra nga një prokurore e misionit të BE-së provohen, mund të dëmtojnë seriozisht reputacionin e Brukselit në Kosovë.
Anëtari gjerman i Parlamentit Europian Elmar Brok dhe ajo austriake Ulrike Lunacek, thanë në një letër për shefen e politikës së jashtme të BE, Federica Mogherini se ata se janë shumë të shqetësuar dhe të shokuar nga pretendimet për korrupsion të bëra nga prokurorja e misionit të BE, EULEX.
“Nëse akuzat konfirmohen, do të ishte një situatë shkatërrimtare. Besueshmëria e misionit EULEX dhe e BE-së në Kosovë janë në lojë,” thoshin Brok dhe Lunacek në letrën që ia dërguan Mogherinit të mërkurën.
“Roli i misionit në Kosovë është të luftojë korrupsionin dhe duhet të jetë shembull,” thonë ata.
Mogherini lajmëroi të martën se një ekspert i pavarur do të caktohej për të hetuar pretendimet se një gjykatës i EULEX mori ryshfet për të pushuar çështje kundër personave të akuzuar për krime serioze. Gjykatësi italian, Francesco Florit, i ka mohuar me forcë akuzat.
Prokurorja e EULEX, Mariah Bamieh, e cila nxori pretendimet dhe që është pezulluar, ka pretenduan gjithashtu se EULEX nuk ia doli të hetojë dyshimet e saj rreth Florit, dhe në vend të kësaj e shënjestruan atë si një bilbilfryrëse.
Dy anëtarët e Parlamentit Europian e pyetën Mogherinin në letrën e tyre përse është dashur kaq shumë kohë të hetohen dyshimet e ngritura nga Bamieh, e cila thotë se e ka sinjalizuar EULEX për shqetësimet e saj që në 2012.
“Si ka mundësi që një akuzë kaq serioze nuk është hetuar dhe nuk është komunikuar si një çështje emergjente?” pyetën ata, duke kërkuar një hetim të shpejtë dhe transparent.
EULEX merret me çështjet e krimit të organizuar, korrupsionit dhe krimet e luftës që konsiderohen shumë të rëndësishme apo të ndjeshme për t’u përballuar nga gjyqësori i Kosovës.
