Tribunali i Hagës ka liruar ultra-nacionalistin serb, Vojislav Sheshel për arsye shëndetësore, ndonëse gjyqi i tij maratonë nuk ka mbaruar ende.
Tribunali Ndërkombëtar i Krimeve për Ish-Jugosllavinë, ICTY, të enjten liroi përkohësisht Vojislav Sheshelin, i cili ka qenë në gjyq prej 11 vitesh për krime lufte të kryera në Bosnje dhe Hercegovinë, Kroaci dhe Serbi gjatë viteve 1990.
ICTY tha se kishte liruar kreun e Partisë Radikale Serbe për shkaqe humane, duke përmendur përkeqësimin serioz të shëndetit të tij si një nga arsyet kryesore. Ai u diagnostikua me kanceri vitin e shkuar.
Gjykata tha se Serbia i kishte ofruar garancitë dhe qeveria e Holandës nuk e kishte kundërshtuar vendimin. Data e mbërritjes së tij në Serbi nuk është caktuar ende.
Qeveria e Serbisë të mërkurën tha se do të siguronte të gjitha garancitë e nevojshme për Sheshel. “Siguria e dëshmitarëve dhe integriteti i procedurave do të garantohet,” tha ajo.
Qeveria premtoi gjithashtu se Sheshel nuk do të kishte kontakt me dëshmitarët apo viktimat dhe se do të kthehej në Gjykatë kur të urdhërohej.
Zoran Krasic, një pjesëtar i skuadrës ligjore të Sheshel tha gjithashtu se nuk dihej ende se kur mund të mbërrinte ai në Serbi.
“Tani është çështje procedurash. Policia e dy vendeve duhet të bjerë dakord për procedurat e transportimit të Sheshel nga Haga në Beograd,” tha Krasic për BIRN.
Aleksandar Vulin, ministri serb i Mirëqenies Sociale, se forca që ai nuk i përmendi emrin po kërkonin të përdornin mbërritjen e Sheshel për të nxitur trazira.
“Ka përpjekje që të përdoret mbërritja e Sheshel kundër kryeministrit Vucic dhe si diçka që do të destabilizojë Serbinë,” tha Vulin për Pink TV të premten.
Vulin tha megjithatë se “qeveria serbe i dha garancitë për Sheshel në të njëjtin sekondë kur iu kërkuan”.
Milan Antonijevic, kreu i Komitetit të Avokatëve për të Drejtat e Njeriut, YUCOM, tha se Gjykata e Hagës duhet të kishte vepruar më herët.
“Sheshel ishte në burg pa një vendim për shumë gjatë, gjë që është arsyeja përse vendimi duhet të ishte marrë më herët që të mos cenohej reputacioni i Tribunalit,” tha Antonijevic për BIRN.
Sheshel është burgosur në Holandë që prej vitit 2003, kur ai vullnetarisht u dorëzua në gjykatën e OKB-së. Vendimi i tij pritej të jepej në tetor të vitit të shkuar, por u shty pasi një nga gjykatësit u largua për paragjykime.
Gjykatësi i ri pritet të marrë kohë deri në fund të qershorit 2015 për t’u familjarizuar me detajet e çështjes, duke shkaktuar një tjetër vonesë në gjyqin maratonë.
