Dragoslav Kosmajac, i cili sipas kryeministrit serb është një nga lordët më të mëdhenj të drogës në Ballkan, u arrestua bashkë me shtatë të tjerë për dyshime se ka bërë evazion me taksat.
Kosmajac u arrestua në shtëpinë e tij në Beograd të dielën, së bashku me shtatë persona të tjerë që punonin me të, të dyshuar për evazion fiskal dhe shkelje të tjera.
“Jemi të përqendruar në gjërat që mund t’i provojmë menjëherë; këto janë të lidhura me krimet financiare, pronat të cilat nuk kanë origjinë të ligjshme ose mosdeklarim i saktë i taksave për pronësinë. Kjo hap një dritare të re në hetimin dhe provimin e gjërave të tjera,” tha ministri i brendshëm serb Nebojsa Stefanovic.
Stefanovic e krahasoi çështjen e Kosmajacit me hetimin e FBI-së ndaj gangsterit të viteve 1930, Al Kapone, i cili u hetua gjithashtu për evazion me taksat.
“Kemi punuar shumë dhe me kujdes për të mbledhur prova që do të ishin të mjaftueshme për sekuestrimin e pronësisë,” shtoi ai.
Të tetë të dyshuarit janë mbajtur në burg për 48 orë teksa janë pyetur, dhe më pas një gjykatës do të vendosë nëse do të mbahen më tej apo jo.
Kryeministri serb Aleksander Vuçiç e denoncoi Kosmajacin me terma dramatike në një konferencë për shtyp më 20 qershor kur lajmëroi largimin e të gjithë shefave të policisë së Serbisë sepse nuk arritën të luftonin kartelët e narkotikëve.
“Çdokush po hesht rreth kontakteve mes policisë dhe Kosmajacit. Kam bërë thirrje për aksion kundër tij dhe kjo nuk ka ndodhur ende deri më sot,” tha Vuçiç.
Pas këtij akuzimi, Kosmajac u largua nga Serbia dhe hyri në Malin e Zi me një pasaportë sllovake.
Policia e Malit të Zi e burgosi në rezortin e Kotorrit për dyshime të falsifikimit të dokumenteve në korrik, por e liroi më pas sepse sipas tyre nuk kishin bazë për ta mbajtur më gjatë.
Një raport i ministrisë së brendshme serbe e ka listuar Kosmajacin si një nga kontrabandistët më të mëdhenj të drogës të këtij shekulli duke filluar që nga 2001.
Tanjug, N1
