Gjyqi i Zdravko Mustac dhe Josip Perkovic, ish shefa të spiunazhit jugosllav të akuzuar për vrasjen e një emigranti kroat, dëgjoi se viktima në mënyrë të përsëritur i tha të dashurës gjermane se ai po jetonte me frikë.
Herta Strossberger, ish e dashura e Stjepan Djurekovic, disidentit që u vra në Gjermani më 1983, dëshmoi në gjyqin për vrasje në Mynih të martën se ai i pati thënë asaj se qe i shqetësuar se mund të rrëmbehej nga policia sekrete e Jugosllavisë UDBA.
“Djurekovic kishte shumë frikë se do të rrëmbehej dhe dërgohej në Jugosllavi,” tha Strossberger, e cila e takoi Djurekovic kur ky i fundit po punonte për agjencinë kroate të energjisë INA.
Ajo tha se ai i kërkoi asaj të kontaktonte policinë nëse ai humbiste për 24 orë dhe një ditë para vrasjes, ai i tha asaj sërish: “Kam frikë.”
Strossberger tha se ajo dëgjoi për herë të fundit nga Djurekovic në ditën që ai u vra, kur ata planifikuan të takoheshin në mesditë për një piknik. Ajo e priti për gjysmë ore dhe pastaj mori në telefon shtëpinë e saj për të parë nëse ai kishte telefonuar.
Ajo zbuloi ditën tjetër nga media se ai qe vrarë, tha ajo.
Akuza thotë se Mustac, i cili qe kreu i UDBA në atë kohë, i dha urdhër Perkovic të organizojë vrasjen. Perkovic zgjidhi problemet logjistike dhe zgjodhi vendin ku Djurekovic duhej të vritej – një garazh në të cilin ai shtypte materiale propagandistike anti-Jugosllave.
Mustac dhe Perkovic kanë deklaruar veten të pafajshëm për çfarëdolloj lidhjeje me vrasjen.
Strossberger tha se pasi Djurekovic u vra, ajo nuk u shqetësua se mund të kthehej gjithashtu në objektiv për shkak se ai i pati thënë asaj se “UDBA nuk do t’i bëjë kurrë keq një gjermani në mënyrë që të ruante marrëdhënie të mira politike mes Jugosllavisë dhe Gjermanisë”.
Ajo tha se Djurekovic i tregoi asaj gjithçka mbi jetën e saj si një disidente.
“Ai më tha mua se po shkruante një libër; se ai qe menaxher nafte, që njihte [Presidentin e Jugosllavisë Josip Broz] Tito… Ai tha se iu desh të arratisej nga Jugosllavia për shkak se ai qe një kundërshtar i regjimit dhe se ata [disidentët] kishin frikë se mund të arrestoheshin,” tha ajo.
Ajo tha se Djurekovic i pati thënë asaj se libri i tij qe për korrupsionin në kompanitë shtetërore dhe se ai po e shkruante atë në mënyrë që t’i tregonte punëtorëve se si jetonin elitat politike dhe ekonomike në Jugosllavi.
Djurekovic qe i pasur, tha ajo; ai bleu një makinë të re për 30 mijë marka gjermane dhe po shpenzonte 25 mijë marka për publikimin e librit të tij në gjermanisht.
“Unë e pyeta atë se si i kishte gjetur kaq shumë para dhe ai u përgjigj se ai pati shitur një copë tokë që e pati trashëgimi në vendin e tij,” tha Strossberger.