Një dëshmitar i tha gjyqit të “Grupit të Drenicës” të Ushtrisë Çlirimtare të Kosovës, i cili akuzohet se sulmoi të burgosurit gjatë luftës së viteve 1998-99, se politikani Sami Lushtaku kreu vrasje për hakmarrje.
Dëshmitari i mbrojtur me kodin ‘D’ i tha gjykatës në Mitrovicë të mërkurën se Lushtaku, i cili tashmë është kryekomunar i Skënderajt/Srbica në Kosovë, vrau një njeri më 1998 për hakmarrje për shkak se viktima kishte vrarë kushëririn e tij.
Duke dëshmuar përmes një videokonference, dëshmitari tha se ai qe bashkë me Lushtakun në ditën e vrasjes, e cila ndodhi diku mes fshatrave Duboç dhe Galic më 31 gusht ose 1 shtator 1998.
Viktima, i cili qe sjellë aty nga dy gueriles të UÇK, u lidh dhe u ul në gjunjë dhe u lut që t’i falej jeta para se të qëllohej. “Mos më vrit, të lutem,” tha ai, sipas dëshmitarit.
Lushtaku pastaj e qëlloi atë tri herë në kokë dhe ushtarët larguan trupin, tha dëshmitari.
“Qe një moment i tmerrshëm për mua. Ndodhi shumë shpejt. Unë nuk munda të bëj asgjë për ta ndaluar,” tha ai.
Ai tha se Lushtaku qe shumë nervoz pas kësaj dhe i shpjegoi arsyen e vrasjes.
“E vrava sepse ai kishte vrarë kushëririn tim Adem Lushtaku,” tha Lushtaku, sipas dëshmitarit.
Lushtaku gjendet në gjyq i akuzuar për vrasjen e një njeriu dhe për keqtrajtimin e të burgosurve në një qendër të UÇK-së në Lukovc më 1998.
Në gjyq për abuzimet në kampin burg është edhe ish ambasadori i Kosovës në Shqipëri dhe ish-komandanti i Forcës së Sigurisë së Kosovës Sylejman Selimi, si dhe pesë luftëtarë të tjerë të UÇK-së.
