Qindra studentë dhe pedagogë protestuan para Kryeministrisë të mërkurën, kundër vendimit të qeverisë për t’ia transferuar Gjykatës së Lartë ndërtesën e fakultetit të Gjeologji-Minierave.
Pas vizitës në Serbi, ku pohoi se pavarësia e Kosovës është e patjetërsueshme dhe një realitet që Beogradi duhet ta njohë, kryeministri Edi Rama u prit me protesta nga studentët, të cilët ishin mbledhur përpara Kryeministrisë për të protestuar vendimin e qeverisë për fakultetin.
Mes sloganeve të studentëve që depërtonin në ambientet e qeverisë, Rama zbriti shkallët e kryeministrisë për folur drejtpërdrejt me ta, në një tentativë për t’i qetësuar studentët. Ai premtoi se zhvendosja e fakultetit nuk do të bëhej në mënyrë të menjëhershme.
“Nuk do të ketë asnjë largim pa i pasur mjediset ashtu siç i takojnë universitetit, në po atë vend, por jo në atë hapësirë, me mjedise më të mira,”- u tha Rama studentëve, që mosbesues thërrisnin në kor:‘Turp,turp!’
Para mbërritjes së Ramës, studentët ndaluan dy përfaqësues të Partisë Demokratike, Enno Bozdo dhe Jorida Tabaku që t’i bashkëngjiteshin protestës, duke i akuzuar se po tentonin ta politizonin atë.
Sipas vendimit të qeverisë, të marrë më 5 Nëntor, godina e Fakultetit të Gjeologjisë dhe Minierave, me të gjitha hapësirat e saj kalon nga administrimi i Ministrisë së Arsimit dhe i Universitetit Politeknik në atë të Ministrisë së Drejtësisë.
“E kuptoj që jeni të surprizuar, se kishit në plan të bërtisni dhe ju doli mundësia për të biseduar,” -u ankua Rama, duke shtuar që ai kishte diskutuar me dekanin dhe rektorin për zhvendosjen e fakultetit.
“Kjo që bëni është sikur të gëzoheni që nuk keni vajtur në mësim,” ironizoi ai.
Një nga pedagogët që kishte dalë për të mbështetur studentët i tha BIRN që dekani i fakultetit dhe rektori i universitetit nuk e mbështesin nismën e studentëve për të protestuar, për shkak të “konjukturave politike.”
Duke iu përgjigjur Ramës në rrjetet sociale, studentët e bënë të qartë se protesta e tyre për fakultetin do të vazhdojë.
“Sipas një leksioni teorik te Kryeministrit, qytetarët e Shqipërisë nuk kanë të drejtë të lexojnë VKM-të e Qeverisë!!!,” komentoi Jani Marka, një prej nismëtarëve të Lëvizjes për Universitetin.
“Një pjesë [e studentëve] i kërkuan Policisë së Shtetit të merrte masa dhe të largonte kryeministrin si prishës të një aktiviteti protestues ndaj tij…” shtoi ai.
Arlind Qorri, profesor i shkencave politike në Universitetin e Tiranës, u shpreh se kryeministri tentoi të prishte protestën e studentëve, duke mos respektuar të drejtën e tyre kushtetuese.
“ Ai u harxhoi kohën pjesëmarrësve me propagandë qeveritare e sofizma të tipit: “Ju nuk do të largoheni prej andej, derisa t’ju çojmë diku tjetër” – a thua se protesta bëhej për lënien në mes të katër rrugëve e jo për degdisjen dhe poshtërimin e dinjitetit të universitarëve,”-tha Qorri, i cili shtoi më tej se protesta është një e drejtë kushtetuese dhe jo një lëshim që ta bën kryeministri.