Në kërkim të mënyrave të reja për të ulur shpenzime dhe për të pakësuar deficitin, qeveria po peshon uljen e pagave të sektorit publik me 3 për qind vitin e ardhshëm.
Qeverisja e qendrës së majtë të Kroacisë po peshon masa të reja dhe të ashpra për t’u përballë me deficitin e lartë buxhetor prej 5.8 për qind të PBB dhe me borxhin e përgjithshëm shtetëror të barabartë me 81.7 të PBB vjetore.
Nëse një paketë reformash të projektuara për të ulur koston e qeverisjes nuk rigjallëron ekonominë deri në maj 2015, ministri i financave Boris Lalovac ka paralajmëruar se me shumë gjasa rrogat e sektorit publik do të ulen me 3 për qind.
Ulja do të aplikohet nga korriku 2015 dhe do prekë 250,000 persona, e do t’i kursejë qeverisë një total prej 85 milionë euro.
Qeveria ende shpreson ta shmangë këtë duke kursyer në administratën publike, duke inkurajuar daljen e hershme në pension dhe me anë të një politike të kufizimit të punësimit. Kjo do të thotë që do të punësohet vetëm një punonjës i ri për çdo dy të tjerë të dalë në pension.
Qeveria ka pezulluar tashmë të gjitha bonuset në sektorin publik, si ai i Krishtlindjeve dhe dhuratat për fëmijët.
Qeveria kroate zakonisht e ka shmangur uljen e pagave në sektorin publik pasi në të përfshihen vetëm 22 për qind e të gjithë atyre që janë në gjendje pune.
Ndërkohë parashikohet se trendi negativ i PBB do të marrë fund vitin e ardhshëm me një rritje prej 0.5 për qind të PBB në vitin 2015 dhe me 1.5 për qind në 2017.
Qeveria thotë gjithashtu se deficiti buxhetor do të bjerë me 3.8 për qind të PBB-së në 2015 dhe me 2.3 për qind në 2017. Borxhi i përgjithshëm shtetëror do të pakësohet me 81 për qind të PBB deri në vitin 2017.
