Politikanët në qeverisje në Serbi e shohin si më pak të rëndësishëm nga ç’duket kthimin e bujshëm nga Gjykata e Hagës të liderit nacionalist dhe të të dyshuarit për krime lufte, Sheshelit, i cili është betuar të largojë qeverinë.
Ministri i brendshëm serb, Nebojsa Stefanovic e zhvlerësoi idenë se kthimi i Sheshelit nga Gjykata e Hagës të mërkurën mund të ishte një rrezik i madh politik që do të sfidonte qeverisjen e Partisë Progresive, disa prej anëtarëve kyç të së cilës kanë qenë anëtarë të partisë Radikale Serbe të liderit nacionalist.
“Nuk lejoj askënd të na tërheqë në baltën politike apo në të shkuarën, pavarësisht nëse është Shesheli apo ndonjë nga Partia Radikale Serbe,” tha Stefanovic.
Ministri i jashtëm Ivica Daçiç tha ndërkohë se ideja e Sheshelit për një “Serbi të Madhe” që përfshin pjesë të Kroacisë dhe Bosnjës është tani histori.
“Në shekullin e 21, ideja e Splitit, Zagrebit apo Dubrovnikut si pjesë e Serbisë nuk mund të marrin mbështetje serioze politike,” tha Daçiç për radion publike RTS.
“Por jam i lumtur që ai është liruar,” shtoi Daçiç.
Qindra nacionalistë e përshëndetën kthimin e Sheshelit të mërkurën në aeroportin e Beogradit teksa ai mbërriti pas lirimit të përkohshëm për t’u trajtuar pas 11 vitesh paraburgim.
Shefi i Partisë Radikale Serbe i tha adhuruesve të tij se plani i tij ishte të përqendrohej në largimin e kryeministrit serb Aleksandar Vuçiç dhe të presidentit Tomislav Nikoliç nga pushteti.
Sheshel e quajti Vuçiçin dhe Nikoliçin “tradhtarë” dhe tha se “kishin shitur nderin e serbëve dhe se kishin hequr dorë nga nacionalizmi serb për t’u bërë shërbëtorë të perëndimit”.
Si Vuçiç dhe Nikoliç ishin zyrtarë të lartë ta partisë radikale serbe deri në 2008, kur vendosën të formojnë partinë progresive, e cila që atëherë ka mbështetur një drejtim pro-europian, që Sheshel nuk e pëlqen.
Megjithatë Vuçiç vendosi të komentojë ndaj kërcënimeve të Sheshel.
“I uroj shëndet dhe fat,” i tha ai gazetarëve.
Por ministri i punës, Aleksandar Vulin, që pretendoi më herët e Sheshel po lirohej për të destabilizuar qeverisjen e Vuçiç, ia hodhi fajin SHBA-së për vendimin e Tribunalit të Hagës që e la Sheshelin të kthehej.
“Nuk kam asnjë arsye të jem një diplomat dhe mund të shprehem lirshëm – Tribunali i Hagës është i kontrolluar nga SHBA dhe kjo e liroi atë… Përmes fjalëve të tij, SHBA po thotë se ai do të përmbysë qeverinë tonë,” tha Vulin.
Zyrtarët kroatë megjithatë shprehën pendesë që Tribunali i Hagës e liroi Sheshelin përpara vendimit për gjyqin e tij të krimeve të luftës.
“Është shumë zhgënjyese që një gjykatë që çdokush e besonte nuk ishte në gjendje të jepte vendimin gjatë gjithë këtyre viteve,” tha presidenti kroat Ivo Josipovic.
Kryeministri kroat Zoran Milanovic tha se “edhe fjalët e Sheshelit nga 1990 janë një shkelje e rëndë kriminale.”
“Ai burrë po bënte thirrje për pastrim etnik dhe vrasje dhe ai duhet të ishte dënuar në çdo gjendje,” tha Milanovic.
Shesheli u mbajt në paraburgim për më shumë se 11 vjet në Gjykatën Ndërkombëtare Penale për Ish-Jugosllavinë, ku ai po qëndron i akuzuar për krime lufte të kryera në Bosnjë dhe Hercegovinë, Kroaci dhe Serbi.
Vendimi i tij pritej të jepej në tetor të vitit të shkuar, por u shty pasi një nga gjykatësit u largua për paragjykime.
Gjykatësi i ri pritet të marrë kohë deri në fund të qershorit 2015 për t’u familjarizuar me detajet e çështjes, duke shkaktuar një tjetër vonesë në gjyqin maratonë.
Partia e tij po planifikon edhe një manifestim të madh mirëseardhjeje të shtunën në Sheshin Republika në qendër të Beogradit, ku pritet që udhëheqësi nacionalist të mbajë një fjalim.
