Programuesi i lojës android të quajtur Autochthonous, e cila e merr frymëzimin nga incidenti që pezulloi ndeshjen midis Shqipërisë dhe Serbisë për Euro 2016, i tha BIRN që ai nuk kishte pasur për qëllim te ofendonte askënd.
Loja e thjeshtë për sistemin android, e cila u publikua në Google Play Store në 11 nëntor, ka marrë në një javë më shumë se 3500 recensa dhe është bërë objekt debati midis shqiptarëve dhe serbëve.
Ndërkohë që komentuesit shqiptarë në faqen e lojës i japin në shumicën e tyre pesë yje, disa nga komentuesit Serb ankohen që loja është ofenduese dhe nënvizojnë që Play Store nuk duhet ta kishte lejuar publikimin e saj.
Loja përbëhet nga një dron në një stadium futbolli i cili valëvit flamurin Autochthonous. Lojtarët e lojës fitojnë pikë në qoftë se e mbajnë dronin lartë në ajër pa i dhënë mundësinë futbollistëve të veshur me një fanellë të kuqe, që i ngjason fanellës së kombëtares serbe, që ta kapin atë.
Pikë shtesë jepen kur futbollisti kërcen për ta kapur flamurin dhe nuk e arrin atë.
“Autochthonous nuk është ofendim,” tha krijuesi i lojës Jusuf Alija. “Autochthonous është metaforë e ashpër ndaj ndodhive që ndodhën në Beograd dhe përfshinë të tri palët, Kombëtaren, Serbët dhe UEFA-n.
Nëse loja vazhdon të marrë ngjyrime politike, dhe për më tepër, krijon urrejtje ndëretnike atëherë loja do të hiqet,” shtoi ai.
Ndeshja e luajtur më 14 tetor në Beograd midis Shqipërisë dhe Serbisë për fazën kualifikuese të kampionin Europian që do të mbahet në 2016 në Francë, u ndërpre në minutën e 41-të, pasi një dron fluturoi mbi stadium duke mbajtur një hartë të ‘Shqipërisë së Madhe’ të mbuluar me një flamur shqiptar dhe me portretet e dy baballarëve themelues të Shqipërisë, Ismail Qemali dhe Isa Boletini.
Kërcimi i futbollistit serb Stefan Mitroviç për të kapur banderolën u pasua nga një përleshje mes dy skuadrave, kur lojtarët shqiptarë ia rrëmbyen banderolën Mitroviçit.
Përleshja u kthye në sherr kur një grup huliganësh serbë zbritën në fushë dhe goditën lojtarët shqiptarë, duke e shtyrë arbitrin britanik Martin Atkinson të pezullojë ndeshjen. Rezultati qe 0:0 në atë moment.
Videot dhe fotografitë tregojnë tifozë serbë duke sulmuar futbollistët shqiptarë me grushte dhe shkelma dhe lojtarët serbë që përpiqen t’i mbrojnë ata.
Tifozët serbë hodhën gjithashtu fishekzjarrë dhe çakmakë ndaj lojtarëve shqiptarë ndërsa këta të fundit u larguan nga fusha. Një prej lojtarëve shqiptarë u godit nga një huligan që pati dalë në fushë.
Alija është një programues nga Maqedonia i cili krijon lojëra elektronike në kohën e tij të lire. Edhe pse ai thotë që e kishte pritur që loja do provokonte reagim, nuk priste që ajo të politizohej.
“Ne donim të shprehnim idetë tona nëpërmjet diçkaje ndryshe, në mënyrë që e gjithë bota të na dëgjonte,” tha Alija.
“Ndërkohë që të tjerët protestuan kundër çdo gjëje që ndodhi në Beograd dhe pas, ndërmjet Shqipërisë, Serbisë dhe UEFA’s me banderola, media, karikatura, ne vendosëm t’i sillnim të gjithë këto ngjarje në një lojë elektronike,” shtoi ai.
Alija shpjegoi që lojën e kishte krijuar në një periudhë prej një jave si një shprehje artistike të asaj që ndodhi gjatë ndeshjes, duke pasur në mendje që do të luhej nga të rinjtë dhe ishte një mënyrë e mirë për të rikujtuar atë që ndodhi në Beograd.
“Unë sigurisht që nuk jam krenar nga komentet që po shoh ku shqiptarët ofendojnë serbët,” tha ai.
“Futbolli është një lojë që duhet të luhet dhe jo të luftohet, ashtu si dhe loja ime” tha Alija. “Unë jam zhvillues [programesh] dhe bëj art për qejf dhe jo për urrejtje,” shtoi ai.
