Pas vetëm një javë në atë post, Ministri i ri i Jashtëm, Teodor Melescanu, është larguar, pas një tjetër problemi me votimin e rumunëve që ndodhen jashtë shtetit.
“Mbaj përgjegjësi të plotë për atë që ka ndodhur dhe do të paraqes dorëheqjen në mbledhjen e sotme të qeverisë,” tha Teodor Melescanu të martën.
Melescanu tha se ai kishte vendosur të largohej nga posti i ministrit të jashtëm për shkak të zemërimit mbi radhët e gjata dhe skenat kaotike që u panë në ambasadat jashtë vendit, ku rumunët u përpoqën të hidhnin votat në raundin e dytë të zgjedhjeve presidenciale të 16 nëntorit.
Një total prej 378,811 rumunë votuan nga jashtë shtetit atë ditë, më shumë se dyfishi i numrit të regjistruar në raundin e parë të mbajtur dy javë më parë.
Megjithatë, mijëra të tjerë nuk qenë në gjendje të votonin, pasi mbajtën radhë për disa orë në qendrat e votimit në ambasada dhe konsulata. Në Paris, Londër dhe Torino, ata që kishin shkuar të për votuar dhe që u zemëruan u përplasën me policinë vendase.
Aktualisht, votuesit duhet të votojnë në fletë votimi të printuara, që më pas shënjohen me një vulë zyrtare. Por procesi është i ngadaltë, duke e kufizuar kështu shpejtësinë e votimit.
Ministri i jashtëm i mëparshëm, Titus Corlatean, u dorëhoq për të njëjtën arsye më 10 nëntor.
Ai e la postin pasi qindra mijëra njerëz protestuan në qytete të ndryshme të vendit në mbështetje të rumunëve që jetojnë jashtë dhe që nuk ishin në gjendje të votonin në raundin e parë të zgjedhjeve presidenciale.
Klaus Iohannis, 55 vjeç, kreu i Partisë Kombëtare Liberale, PNL, në opozitë, dhe një anëtar i komunitetit të vogël etnik gjerman në Rumani, korri një fitore surprizë në zgjedhjet presidenciale të së dielës, ku mori 54.6 për qind të votave.
Rumania ka një diasporë të madhe. Mbi dy milionë rumunë jetojnë ose punojnë jashtë shtetit, kryesisht në Itali, Spanjë, Gjermani dhe Francë. Megjithëse vetëm një pjesë e vogël votuan në zgjedhje, ata kanë fuqinë të ndikojnë në rezultat.
