Të përshkruar si pushtet-dashës ballkanasit po tregojnë se po huazojnë ngadalë kulturën e dorëheqjes, që konsiderohet si një tabu politike, por njëkohësisht edhe si virtyt moral për ata që kanë pozicione shtetërore.
Ballkanasit po i befasojnë gjithnjë e më shumë ndërkombëtarët me sjelljen e tyre politike këto kohët e fundit. Dorëheqjet janë një nga çuditë mëse të zakonta për botën, por që në rajonin në fjalë përbëjnë lajm.
Rumani
“Mbaj përgjegjësi të plotë për atë që ka ndodhur dhe do të paraqes dorëheqjen në mbledhjen e sotme të qeverisë,” tha Teodor Melescanu të martën, teksa la postin e Ministrit të Jashtëm të Rumanisë të cilin e mbajti vetëm për një javë. Ai u dorëhoq për shkak të problemit të votimit të emigrantëve rumunë në zgjedhjet presidenciale.
Ministri i jashtëm i mëparshëm, Titus Corlatean, u dorëhoq për të njëjtën arsye më 10 nëntor. Ai dështoi të organizonte zgjedhje normale në ambasadat dhe konsullatat e Rumanisë nëpër botë, në mënyrë që emigrantët, që janë rreth 2 milionë dhe që mund të ndikojnë në rezultatin e zgjedhjeve, të mund të merrnin pjesë në votime.
Në një tjetër rast në Rumani, Viorel Hrebenciuc, një figurë kyçe në drejtimin e Partisë Social Demokrate, PSD, lajmëroi më 21 tetor se ai po dorëhiqej nga parlamenti, një ditë pasi hetuesit hapën çështje për korrupsion dhe përdorim të influencës. “Dua të jem i gatshëm për hetim të mëtejshëm…” Prokurorët anti-korrupsion lajmëruan se kishin nisur një çështje penale ndaj Hrebenciuc dhe një lideri tjetër të njohur të PSD, senatorit Dan Sova, për bashkëpunim në hartimin e një ligji amnistie dhe faljeje në çështjet kriminale që i jepnin përfitime materiale politikanëve.
Kroaci
Në Kroaci, veteranët e Luftës së Atdheut kërkojnë dorëheqjen e ministrit të veteranëve të luftës, Predag Matic dhe hartimin e një ligji të ri kushtetues që i shton të drejtat e tyre. Ata protestuan për disa javë përpara ministrisë përkatëse, ku ndodhën edhe ngjarje tragjike si vdekja e një protestueseje të gjymtuar dhe një tjetër veteran i vuri flakën vetes duke u djegur rëndë.
Mali i Zi
Një infeksion i përhapur në pavijonet e materniteteve në Malin e Zi, i ka nxitur dhjetëra qytetarë të kërkojnë dorëheqjen e Ministrit të Shëndetësisë, Miodrag Radunovic, pasi gjendja alarmante ka marrë jetën e një foshnje të porsalindur. Ai dha dorëheqjen pas thirrjeve ndaj tij. Më herët është larguar drejtori i pavijonit të maternitetit, Bijelo Polje dhe ka dhënë dorëheqjen drejtori i spitalit, Tomislav Jeremic. Partitë politike në vend kanë bërë thirrje për hetime dhe mbledhjen e një grupi parlamentar për seancë dëgjimore ndaj Ministrit të Shëndetësisë.
Shqipëri
Edhe Shqipëria nuk mbeti më prapa në fenomenin e dorëheqjes ku bujë të madhe mediatike bëri deklarata e deputetes së Partisë Socialiste, Luiza Xhuvani. “Do të tërhiqem në thellësinë e dhimbjes me peshë të parehabilitueshme. Drejtësia le të bëjë drejtësi!” – këto ishin fjalët e deputetes, djali i të cilës është nën hetim, i dyshuar për vrasje të katërfishtë.
Klima e re e krijuar së fundmi në rajon mund të jetë një shkak i politikave shtrënguese të ndërkombëtarëve që kërkojnë zbatimin e ligjit dhe transparencë, ndër kushtet e shumta të anëtarësimit aktual dhe të ardhshëm në Bashkimin Europian.
