Avokatja europiane e Popullit po heton nëse EULEX ka ndërmarrë të gjitha masat që duhen për të hetuar akuzat për korrupsion të bëra ndaj misionit.
Avokatja europiane e popullit, Emily O’Reilly, ka vendosur të kontrollojë nëse Shërbimi Europian i Veprimit të Jashtëm, EEAS, po heton siç duhet akuzat e shkeljes nga EULEX.
Gazeta me bazë në Kosovë, Koha Ditore, raportoi se kishte parë një letër të dërguar te shefi i operacioneve të EEAS, Patrick Child, në të cilën O’Reilly thoshte se ajo ka vendosur të kryejë hetimet e veta për akuzat e bëra nga bilbilfryrësja e EULEX rreth korrupsionit dhe ryshfetit.
O’Reilly citoi se qëllimi i saj nuk ishte hetimi i pretendimeve kundër EULEX, por verifikimi nëse EEAS/EULEX kishin ndërmarrë të gjitha hapat e nevojshëm për të hetuar pretendimet.
“Raportime për akuza të tilla janë botuar në media. Këto raportime sugjerojnë se ka dyshime nëse EEAS dhe EULEX e kanë hetuar siç duhet këtë çështje,” shkroi O’Reilly. “Unë besoj se ju bini dakord se pretendimet e bëra janë të një natyre serioze”.
Problemi filloi kur një prokurore britanike e EULEX, Maria Bamieh, në tetor akuzoi një gjyqtar italian të EULEX, Francesco Florit, se kishte marrë 300,000 euro ryshfet për të liruar një burrë të akuzuar për vrasje dhe se kishte kërkuar një tjetër ryshfet në një çështje korruptive ndaj një zyrtari të qeverisë së Kosovës.
Bamieh tha se zyrtarët e EULEX nuk ia vunë veshin thirrjeve të saj për hetim në lidhje me akuzat dhe në vend të kësaj e pezulluan atë.
