Pasi presidenti rus Vladimir Putin pezulloi gazsjellësin South Stream, Kroacia ka përshpejtuar planet e saj për ndërtimin e një terminali gazi në ishullin Krk në mënyrë që të sigurojë furnizimin e vet me gaz.
Zëvendës kryeministri kroat, Branko Grcic tha të mërkurën se anulimi i projektit South Stream ishte ‘një nxitje për të ndërtuar terminalin LNG më shpejt”.
Grcic tha se anulimi i South Stream, që do të kalonte gazin rus nëpër Bullgari dhe Serbi për të Europë, do ta bëjë terminalin në Krk më të vlefshëm.
“Për shkak se është një burim alternativ i furnizimit me gaz në këtë pjesë të Europës,” tha ai.
Ministri kroat i ekonomisë, Ivan Vrdoljak ndërkohë tha se ndalimi i projektit South Stream nuk do të ndikonte fare në strategjinë energjetike të Kroacisë, sepse vendi nuk do të përfitonte direkt nga gazsjellësi.
Vrdoljak tha se, si alternativë, Kroacia “ka filluar projektin e eksplorimit dhe shfrytëzimit të naftës dhe gazit [në detin Adriatik] dhe ndërtimi i LNG [terminali i gazit të lëngshëm natyral] do të jetë dukshëm i vetmi opsion i furnizimit me gaz për këtë pjesë të Europës”.
Kroacia ka marrë pesë milionë euro për dokumentacionin e projektit nga BE për terminalin LNG në Krk, që hap mundësinë për financimin e projektit me paratë e BE-së.
LNG Kroacia, kompania shtetërore e themeluar për të drejtuar terminalin, ka hapur një tender për një këshilltar për punën, financimin dhe çështjet ligjore në periudhën e përgatitjes për ndërtimin.
Këshilltari do të jetë përgjegjës për hartimin e dokumentacionit të projektit dhe për gjetjen e investitorëve për ndërtimin dhe drejtimin e terminalit.