I akuzuari për krime lufte Vojisllav Sheshel, i liruar përkohësisht nga Gjykata e Hagës për t’u kuruar nga kanceri, tha se partia e tij do të ndërmarrë një fushatë publike për të larguar presidentin Tomislav Nikoliç.
Shesheli, lideri i Partisë Radikale serbe, ditën e enjte nisi fushatën e tij kundër ish-aleatit të tij politik Nikoliç, duke kërkuar vënien e tij para përgjegjësisë se ka shkelur kushtetutën e vendit.
“Do të përpiqemi të mbledhim 30,000 firma dhe ta dërgojmë peticionin në parlament. Do të kemi nevojë për mbështetjen e anëtarëve të parlamentit, të paktën për të nisur një debat për të ‘akuzën’,” tha Shesheli në një konferencë për shtyp ditën e enjte.
Ai e akuzoi presidentin serb Nikoliç se e ka shkelur disa herë kushtetutën, duke pretenduar se “ai e ka marrë në mënyrë të paligjshme diplomën e universitetit”.
“Ky është krim, korrupsion dhe çdo akt i tillë është shkelje e kushtetutës”, tha Shesheli.
Nikoliç, i cili ka qenë anëtar i lartë i partisë ultra-nacionaliste të Sheshelit para se të krijonte Partinë Progresive, e cila tani është në pushtet në Serbi, nuk i është përgjigjur ende akuzës.
Të paktën 30,000 votues kanë të drejtë të propozojnë ligjin ose t’i dërgojnë një peticion një organi shtetëror. Por nevojitet mbështetja e një të tretës së ligjvënësve për të propozuar vënien përballë përgjegjësisë dhe shkarkimin e një zyrtari, gjë e cila duket e pamundur të ndodhë, sepse Shesheli nuk ka deputetë në parlament.
Lëvizja duket se ka si qëllim të ruajë publicitetin e politikanit nacionalist në një nivel të tillë për të vënë në siklet autoritetet serbe.
Shesheli u betua përsëri se nuk do të kthehet në Gjykatën e Hagës për vendimin në gjyqin e tij për krime lufte.
“Nuk kam ndërruar mendje. Nuk do të kthehem me dëshirë në Hagë,” tha Shesheli.
Ai e sfidoi qeverinë serbe ta kthejë atë atje me dhunë.
“Do të duhet të më marrin në krahë për të më hipur në avion”, tha ai.
Prokuroria e Gjykatës së Hagës ditën e hënë paraqiti një mocion duke kërkuar revokimin e lirimit të përkohshëm të Shesheli, pasi retorika e tij e ashpër nacionaliste për krijimin e një ‘Serbie më të madhe’ shkaktoi zemërim mes grupeve të viktimave të luftës në Bosnje dhe xhindosi politikanët kroatë.
Parlamenti Evropian javën e kaluar miratoi një rezolutë që i kërkon Gjykatës së Hagës të rimendojë vendimin e saj për lirimin e përkohshëm të Sheshelit. Edhe parlamenti kroat ka deklaruar se e dënon lirimin e tij.
Shesheli, i cili po gjykohet për krime lufte në Bosnje, Kroaci dhe Serbi, ka qenë në burg që prej vitit 2003, kur u dorëzua vullnetarisht.
Vendimi për çështjen e tij ishte programuar të merrej në tetor të vitit të kaluar, por u shty pasi njëri nga gjykatësit u hoq, sepse dyshohej për njëanshmëri.
Gjykatësit të ri pritet t’i duhet kohë deri në fund të qershorit të vitit 2015 që të familjarizohet me detajet e çështjes, duke shkaktuar kështu edhe një tjetër vonesë në gjyqin maratonë.
