Kryeministri Hashim Thaçi tha në Këshillin e Sigurimit të OKB-së se Prishtina tani ishte gati të ngrejë një gjykatë të veçantë për t’u përballur me akuzat serioze kundër zyrtarëve të lartë të UÇK-së.
“Ne do të ngremë një gjykatë të veçantë për të zbuluar të vërtetën për dyshimet për krime lufte. Kosova beson te drejtësia,” tha Thaçi në një seancë të Këshillit të Sigurimit të OKB-së ditën e enjte në Nju Jork.
Gjykata do të ngrihet në Holandë dhe pritet që para sa të dalin emra të lartë të Ushtrisë Çlirimtare të Kosovës të cilët do të akuzohen për krime të kryera gjatë dhe pas luftës në vitet 1998-1999 me forcat serbe.
Ajo do të dëgjojë çështje të ngritura nga raporti i fundit i Task Forcës nga BE-ja për hetime speciale, i cili tha se zyrtarë të papërmendur të UÇK-së do të përballen me akuza për “fushatë persekutimi” kundër serbëve, romëve dhe shqiptarëve të Kosovës, të cilët besohet se kanë bashkëpunuar me regjimin e Beogradit.
Në krimet e pretenduara përfshihen vrasje, rrëmbime, ndalime të paligjshme dhe dhunë seksuale.
Gjykata e re pritej të niste punën në janar të vitit 2015, por është vonuar për shkak të debatit politik që e ka lënë Kosovën pa një qeveri që prej zgjedhjeve kombëtare në muajin qershor.
Thaçi siguroi Këshillin e Sigurimit të OKB-së se është krijuar një koalicion midis PDK-së, që është partia e tij, dhe LDK-së, partisë tjetër kryesore në Kosovë, i cili do të lejojë krijimin e qeverisë dhe miratimin e legjislacionit për vënien në punë të gjykatës së veçantë.
“PDK-ja dhe LDK-ja janë dy partitë më të mëdha në vend. Ato arritën një marrëveshje qeverisëse. Do të doja t’ju konfirmoja se javën e ardhshme do të përcaktojmë institucionet e reja të Republikës së Kosovës,” tha ai.
