Komisioni Europian ka hapur një çështje për shpyllëzimin në Bukuresht të shkaktuar nga një ekspansion në një kompleks të madh miniere.
Komisioni Europian e hapi çështjen për shkak se Rumania ka shkelur një udhëzim të BE-së për vlerësimin e ndikimit mjedisor kur zgjeroi një minierë të linjitit në zonën Rovinari, në jug të vendit.
KE tha se autoritetet rumune nuk ia dolën të respektojnë parimin e zhvillimit të qëndrueshëm pas shpyllëzimit të mbi 700 hektarëve pemë gjatë zgjerimit të minierës.
“Komisioni mori vendimin e duhur,” tha Catalina Radulescu, një avokate dhe anëtare e Lidhjes së ‘Bankwatch’ në Rumani, që është e përfshirë në përpjekjen për të shpëtuar pyjet nga shkatërrimi prej zgjerimit të Rovinarit, një prej fabrikave më të mëdha të qymyrit në Rumani.
“Ky është një sinjal i madh për qeverinë rumune që të gjithë projektet e minierave të planifikuara në zonën Ronivari nuk mund të bëhen pa një vlerësim në ndikimin e tyre mjedisor dhe social. Ne shpresojmë që veprimi do detyrojë autoritetet rumune të bazohen në ligj,” tha Radulescu.
Rumania ende ka shumë punë për të bërë që të mbrojë mjedisin, thonë aktivistët e gjelbër.
Në tetor, KE e çoi Rumaninë në Gjykatën e vet të Drejtësisë për një pellg vdekjeprurës prej 102 hektarë ku gjenden mbetjet e nxjerra nga minierat e bakrit dhe zinkut në Moldova Noua, që e përshkroi si të braktisur dhe të rrezikshme.
Pellgu ndodhet në anën e majtë të Danubit, pranë kufirit me Serbinë. Është përdorur për të mbledhur dhe filtruar ujërat nga nxjerrja e bakrit në Moldomin, i cili ndodhet pak kilometra në veri.
Uji në pellg ka shteruar me kohë dhe tani duket më shumë si një shkretëtirë me shtresë 1.5 metra të pluhurit që përmban përqendrim të lartë të bakrit dhe metaleve të tjera.
Rreth 5780 hektarë të tokës janë prekur nga ky burim ndotje në Rumani, ndërsa 30,000 persona jetojnë në zonën e prekur, nga të dyja anët e Danubit.
Rumania ka dhe 18 sajte të tjera që janë një rrezik mjedisor, sipas aktivistëve të gjelbër.
