Maqedonia po e lë pas stemën e vjetër atë me motive të periudhës komuniste për një luan të kuq në një mburojë të verdhë.
Maqedonia po prezanton një stemë të re, një luan të kuq në një mburojë të verdhë me një kurorë lart, duke zëvendësuar simbolet aktuale të kopjuara në epokën komuniste.
“Stema aktuale është dizenjuar për të shkuar me atë të BRSS. Elementët e detyrueshëm, si dielli, ylli i kuq, kërcenjtë e grurit të lidhura me një fjongo… të gjitha këto simbolizojnë shoqërinë e ndritur komuniste,” lajmëroi qeveria në një deklaratë për shtyp.
Përpara deklarimit të pavarësisë në fillim të viteve 1990, Maqedonia ishte pjesë e Federatës Socialiste të Republikës së Jugosllavisë.
Qeveria, e drejtuar nga partia e qendrës së djathtë, VMRO DPMNE e kryeministrit Nikola Gruevski, befasoi javën e shkuar shumë persona kur lajmëroi se kishte vendosur të ndryshonte stemën.
Partia e shqiptarëve etnikë, Bashkimi Demokratik për Integrim, BDI, tha se mbështeste ndryshimin, pasi luanët mund të gjenden në shumë familje të mëdha dhe të njohura shqiptare.
Emblema e re pret të miratohet nga parlamenti. Duhet të ketë mbështetjen e të paktën 82 nga 123 anëtarëve të parlamentit, që në teori partitë qeverisëse e kontrollojnë.
Stema aktuale e Maqedonisë është një version i rishikuar i një steme të miratuar më 27 korrik, 1946, nga Republika Popullore e Maqedonisë, që ishte pjesë e Jugosllavisë Socialiste.
Në të shfaqen dy kërcenj të përkulur gruri, gjethe duhani dhe fruta lulëkuqe, të gjitha karakteristike në Maqedoni, të lidhura me një fjongo dhe të dekoruara me motive tradicionale të folkut maqedonas.
Në qendër, stema paraqet male, liqene dhe një lindje dielli.
Në vitin 2009, qeveria e Gruevskit e ndryshoi stemën duke hequr yllin e kuq që simbolizonte komunizmin, nga qendra.
Mburoja e re ka një kurorë me gurë të çmuar në krye që përmban elementë nga fortesa e Kale e Shkupit. Emblema ngjason edhe me atë të partisë VMRO DPMNE, që ka gjithashtu një luan të verdhë në një mburojë të kuqe.
Vendimi për të ndryshuar emblemën u mor në mes të një krize parlamentare të vazhdueshme. Që nga zgjedhjet e përgjithshme dhe presidenciale të mars-prillit, opozita, e drejtuar nga Social Demokratët, SDSM, ka refuzuar të shkojë në parlament, duke e akuzuar qeverinë se ka fituar zgjedhjet me mashtrim.
SDSM nuk ka komentuar deri më tani për ndryshimin e emblemës.
Teksa shumica e publikut u befasua nga ndryshimi, që u lajmërua vetëm në një deklaratë për shtyp të qeverisë, pa debat publik, disa media në Bullgarinë fqinje kanë kritikuar lëvizjen si një përpjekje për të kopjuar simbolet kombëtare bullgare. Stema bullgare ka gjithashtu një luan të verdhë në një mburojë të kuqe.
“Qeveria në Shkup ka mbështetur idenë e një steme që është një kopje e tonës,” shkruan e përditshmja bullgare Telegraf.
Gazeta tha se qeveria maqedonase ka neglizhuar të sqarojë se luani është një simbol mesjetar i perandorisë së dytë bullgare.
Megjithëse Bullgaria ishte një nga vendet e para që njohu pavarësinë e Maqedonisë, i konsideron ende maqedonasit etnik në Bullgari dhe gjuhën maqedonase një dialekt të asaj bullgare.
