Autoritetet maqedonase kanë konfirmuar se dy shpërthime tronditën stacionet e policisë në pjesën perëndimore të vendit të martën mbrëma, duke shtuar se vendet nuk u sulmuan drejtpërdrejt.
Autoritetet lajmëruan të mërkurën për dy shpërthime të sinkronizuara që ndodhën rreth orës 9 të mbrëmjes së të martës pranë stacioneve të policisë në qytetet e Tetovës dhe Kumanovës në perëndim dhe veri të Maqedonisë.
Dy qytetet ishin në qendër të konfliktit të armatosur të vitit 2001 mes kryengritësve shqiptarë etnikë dhe forcave të sigurisë maqedonase.
“Shpërthimet u dëgjuan pranë stacioneve të policisë. Nuk u shkaktuan dëme. Nuk mund të jap më shumë të dhëna derisa hetimet në terren të përfundojnë,” tha zëdhënësi i policisë Ivo Kotevski për BIRN.
Shpërthimi në Tetovë ndodhi pranë murit rrethues të oborrit të stacionit të policisë. Shpërthimi në Kumanovë dëmtoi një makinë aty pranë.
Policia refuzoi të thoshte nëse dy shpërthimet janë të lidhura apo të spekulonte për arsyet. Raportimet në media sugjeruan se shpërthimet mund të jenë shkaktuar nga granata dore ose pajisje eksplozive të bëra vetë.
Shpërthimet janë të ngjashme me sulmet në stacionet e policisë të kryera nga militantët shqiptarë etnikë në konfliktin e armatosur të 2001, ku u vranë disa oficerë policie.
Në fund të tetorit, dy sulmues të panjohur hodhën predha ndaj ndërtesës së qeverisë maqedonase në Shkup duke lënë shenja në fasadë. Më shumë se një javë më vonë, një lëvizje misterioze që e quante veten Ushtria e Çlirimit Kombëtar mori përgjegjësi për ngjarjen.
Disa e lidhën sulmin misterioz ndaj ndërtesës qeveritare me shpallen e fundit të një “Republike Iliriade” të shqiptarëve etnikë.
Disa dhjetëra shqiptarë etnikë u mblodhën në Shkup në mesin e shtatorit për të dëgjuar një ish-politikan, Nevzat Halili, teksa lexonte një deklaratë të “një republike të pavarur” shqiptare.
Konflikti i armatosur i vitit 2001 përfundoi me nënshkrimin e Marrëveshjes së Paqes së Ohrit në fund të të njëjtit vit, që parashikoi ndryshime kushtetuese që i jepnin të drejta më të mëdha dhe integrim institucional shqiptarëve që përbëjnë një të katërtën e popullsisë.
Marrëveshja rezultoi në çarmatimin e luftëtarëve shqiptarë dhe krijimin e mëpasshëm të një partie politike, Bashkimit Demokratik për Integrim, BDI, që sot ka vend në qeveri. Megjithatë marrëdhëniet e ndëretnike mbeten të brishta edhe sot e kësaj dite.
