Kreu i Agjencisë Kombëtare të Sigurisë, Boro Vucinic, dha papritur dorëheqjen të martën, edhe prej presionit nga BE-ja dhe NATO.
Në një deklaratë të shkurtër për shtyp, kreu i shërbimit sekret malazez, Boro Vucinic, tha se ai kishte dorëzuar kërkesën për largim nga detyra pas diskutimeve me kryeministrin Milo Djukanovic.
Arsyet formale për dorëheqjen e tij nuk u thanë. Raportimet e medias në Podgoricë sugjeruan se qeveria nuk ishte e kënaqur me performancën e tij në reformimin e agjencisë.
“Në të shkuarën, unë dhe kolegët e mi i shërbyem qytetarëve të Malit të Zi, sigurisë së tyre dhe interesave kombëtare të sigurisë, me zotim të plotë dhe në përputhje me reformat në vend për të ndjekur rrugën e anëtarësimit në NATO,” tha Vucinic në deklaratën e së martës.
Vucinic ishte një bashkëpunëtor i afërt me kryeministrin Djukanovic, ‘ushtari’ i tij, siç thirrej shpesh nga politikanët e opozitës dhe nga media.
Ai drejtoi Agjencinë Kombëtare të Sigurisë, ANB, nga viti 2012 dhe ishte ministri i parë i mbrojtjes në vend, që kur u rifitua pavarësia në 2006.
Ai konsiderohej si i afërt me strukturat e NATO-s dhe ishte një prej mbrojtësve më të vendosur të anëtarësimit në aleancën ushtarake perëndimore.
Por analisti Dragisa Janjusevic beson se presioni nga BE-ja dhe NATO e ka detyruar Djukanovicin të zëvendësojë Vucinic.
Shërbimi i inteligjencës është kritikuar ashpër nga komuniteti ndërkombëtar.
“Agjencia shpesh është kritikuar për mungesë profesionalizmi, zyrtarë të korruptuar, edhe për bashkëpunim me shërbime të huaja të inteligjencës,” tha Janjusevic për BIRN.
Në shtator, qeveria propozoi ndryshime emergjente në ligjin e Agjencisë Kombëtare të Sigurisë, për të krijuar një sistem sigurie që përputhej me standardet e NATO-s dhe për të përmirësuar mënyrën sesi vendi trajtonte informacionin sekret.
Në qershor, NATO vendosi kundër ofrimit të anëtarësisë në aleancën ushtarake këtë vit, duke thënë se do ta merrte parasysh kandidimin e Malit të Zi në 2015.
Zyrtarët NATO-s thanë se Mali i Zi duhet të kryejë ‘reforma të thella’ në shërbimet e sigurisë dhe inteligjencës dhe të sigurojë mbështetje më të madhe publike si kushte kyçe për anëtarësim.
Disa analistë thanë se dobësia e agjencisë së inteligjencës ishte një prej arsyeve kryesore që Mali i Zi nuk mori ftesë për t’u bashkuar me NATO-n në samitin e tij në Uells në shtator.
Agjencia e lajmeve Associated Press raportoi në korrik se NATO e kishte shtyrë vendimin për të ftuar Malin e Zi t’i bashkohej aleancës për shkak të shkallës së gjerë të aksesit që ka Rusia në të. Djukanovic i ka shpërfillur pretendimet e Djukanovic se spiunët rusë kanë mbipopulluar shërbimin.
