Shqiptarët i besojnë më shumë NATO-s e BE-së, ndërsa besimi më i vogël shkon për partitë politike dhe sistemin gjyqësor. 51 për qind e të anketuarve identifikojnë punësimin, si shërbimin më të keq të ofruar nga qeveria aktuale.
Qytetarët shqiptarë rendisin NATO-n dhe Bashkimin Europian si institucionet më të besueshme, ndërsa shprehen se kanë nivelin më të ulët të besimit për partitë politike dhe sistemin gjyqësor në vend. Besimi tek qeveria është rritur me 7 për qind, krahasuar me periudhën prill-maj 2013, ndërsa pikë pozitive kanë shënuar edhe Policia e Shtetit apo Parlamenti.
Të dhënat u bënë publike të mërkurën nga Instituti për Demokraci dhe Ndërmjetësim, pas një sondazhi të realizuar në muajin tetor të këtij viti për të matur besimin e qytetarëve tek Qeveria dhe institucionet publike në Shqipëri.
Gjetjet e sondazhit identifikojnë Policinë dhe sistemin shëndetësor në vend, si fusha ku qeveria e majtë po performon më mirë se në të shkuarën, ndërsa vihet re ulje besimi për Forcat e Armatosura apo Shoqërinë Civile.
Sondazhi i IDM-së ka identifikuar sërish punësimin, si problemin më të madh të qytetarëve shqiptarë. Gjetjet e sondazhit tregojnë se 51 për qind e të anketuarve janë të pakënaqur me ofrimin e shërbimit për punësim nga qeveria aktuale. Kjo shifër është më e lartë edhe se pakënaqësia ndaj shërbimeve të ofruara nga sistemi gjyqësor, për të cilin ankohen 47 për qind e të anketuarve.
Përveç besimit tek qeveria dhe institucionet publike, sondazhi i Institutit për Demokraci dhe Ndërmjetësim ka matur edhe perceptimin e qytetarëve ndaj transparencës së qeverisjes dhe institucioneve të tjera në vend.
“Opinioni publik shqiptar prêt nga qeveria që të jetë transparente, e hapur për qytetarët dhe të zbatojë politikat kundër korrupsionit,’ thonë organizatorët e sondazhit. Qytetarët që kanë marrë pjesë në sondazh kërkojnë në shumicë që informacionet financiare dhe kontratat që financohen nga buxheti i shtetit të bëhen publike.
Gjithashtu, ata kërkojnë më shumë transparencë për pasuritë dhe të ardhurat personale të deputetëve dhe të zgjedhurve vendorë.
Një tjetër gjetje interesante e sondazhit është ai që lidhet me ndikimin që politika ka mbi sistemin gjyqësor në vend. 66 për qind e të anketuarve mendojnë se politika ushtron ndikimin më të madh në punën e sistemit gjyqësor, ndërsa ndikimi më i vogël identifikohet tek institucionet fetare.
Shqipëria është vend anëtar i Partneritetit për Qeverisje të Hapur që prej muajit gusht 2011. Që prej asaj kohe e deri më sot, janë adoptuar dy plane veprimi për të promovuar transparencën dhe pjesëmarrjen e qytetarëve në qeverisje.
Të dhënat e sondazhit të IDM, për përgatitjen e së cilit u intervistuan 1200 qytetarë nga i gjithë vendi tregojnë se Shqipëria është ende larg arritjes së këtij qëllimi.
