Vitin e ardhshëm do të fillojnë fluturimet direkte nga një sërë qytetesh evropiane drejt Rijekës. Do të ketë fluturime direkte nga Gjermania, Britania, Lituania dhe Letonia.
Duke filluar nga viti që vjen, disa linja të reja ajrore do të fillojnë fluturime nga Rijeka drejt Gjermanisë, Britanisë, Lituanisë dhe Letonisë, në përpjekje për të sjellë zhvillim të ri në zonën e Kvarnerit në veri-perëndim të Kroacisë.
Pesë kompanitë që kanë vendosur të nisin fluturimet nga aeroporti i Rijekës në vitin 2015 janë “Ryanair” e Irlandës, “Germanwings” e Gjermanisë, “Novaturas Group” e Lituanisë, “Air Shuttle” e Norvegjisë dhe “Air Baltic” e Letonisë.
Qyteti i Rijekës, me një popullsi prej 150, 000 banorësh në veri të bregdetit Adriaktik kroat, shërben si qendër rajonale, duke tërhequr turistë gjatë rrugës së tyre për në Gadishullin e Istrias apo ishujt Kvarner.
Megjithatë, mungesa e fluturimeve direkte në qytet e ka ngadalësuar zgjerimin e tij. Tani aeroporti i vogël, por në zhvillim e sipër në ishullin Krk po përpiqet ta afrojë më shumë rajonin e Rijekës me rajonet evropiane prej nga vijnë edhe pjesa më e madhe e turistëve.
Edhe linjat ajrore kroate do t’i rrisin aktivitetet në aeroportin e Rijekës, duke e lidhur atë me Mynihun në Gjermani gjatë të gjithë vitit dhe me aeroportin më të madh në Londër, aeroportin “Heathrow”, nga prilli deri në tetor.
“Germanwings” do të lidhë rajonin e Kvarnerit me Këlnin, Shtutgartin, Berlinin, Hamburgun dhe Duseldorfin nga prilli deri në tetor. “Novaturas” do të lidhë Rijekën dhe Vilniusin nga qershori deri në shtator. Ndërsa “Air Baltic” do ta lidhë Kvarnerin me Rigën gjatë të njëjtës periudhë të vitit.
Kompanitë dhe destinacionet ajrore pasqyrojnë rezultatet e një sondazhi të kohëve të fundit, i cili tregonte se pjesa më e madhe e turistëve në rajonin e Kvarnerit vijnë nga Gjermania, Suedia, Britania, Belgjika dhe Lituania.
Rijeka ka lidhje me aeroporte të tjera kroate në Zagreb, Split, Osijek dhe Dubrovnik.
