Euroliga e Basketbollit ka disiplinuar klubet e Beogradit dhe Stambullit për dhunën përpara një ndeshje të fundit që çoi në vdekjen e një tifozi serb.
Trupi disiplinues i Euroligës ka ndëshkuar si Yllin e Kuq të Serbisë edhe Gallatasarajin e Turqisë për ‘incidentet e kryera nga tifozët e tyre dhe për pamundësinë e përshtatjes së masave për të shmangur incidentet përpara ndeshjes në Stamboll më 21 nëntor.
Marko Ivkovic, një tifoz 25-vjeçar i Yllit të Kuq, u qëllua me thikë në zemër gjatë dhunës që shpërtheu përpara stadiumit në Stamboll. Policia turke ka arrestuar të dyshuarin për vrasje.
Euroliga, kompeticioni më i lartë në Europë për klubet profesionale të basketbollit, urdhëroi që Gallatasaraj duhet të luajë tri ndeshjet e ardhshme pa tifozë dhe të paguajë një gjobë prej 100,000 euro, ndërsa Ylli i Kuq duhet të luajë ndeshjen e ardhshme pa tifozë dhe të paguajë gjobën prej 50,000 euro.
Të dyja klubet mund të apelojnë vendimin deri më 19 dhjetor.
Agjencia shtetërore e lajmeve të Serbisë, Tanjung, raportoi se përpara ndeshjes në Stamboll, tifozët e Gallatasarajt sulmuan rreth 400 mbështetës të Yllit të Kuq, të cilët nuk mundën të hynin në stadium pasi nuk mundën të blinin bileta.
Pas dhunës dhe vdekjes së Ivkovic, ministri i brendshëm serb, Nebojsa Stefanovic tha se për hir të marrëdhënieve të mira mes dy vendeve, ishte shumë e rëndësishme që fajtori të sillej para drejtësisë sa më shpejt të ishte e mundur ‘sepse është në interes të publikut dhe shtetit serb”.
