Partitë opozitare maqedonase thanë se plani i qeverisë për të hequr stemën e periudhës komuniste dhe për të zëvendësuar me një luan të kuq në mburojë të verdhë nuk është asgjë më shumë se një shpërqendrim politik.
Partia kryesore opozitare maqedonase Social Demokrate, SDSM, ka dalë kundër stemës së re të propozuar për vendin, duke thënë se plani ishte që të shpërqendroheshin nga problemet e vërteta.
“Ky është një shembull tipik i përpjekjeve të qeverisë për të larguar vëmendjen e publikut nga shumë çështje dhe skandale që duhet të marrin përgjigje,” tha zëdhënësi i SDSM Petre Shilegov.
Qeveria e drejtuar nga kryeministri Nikola Gruevski mori vendimin të ndryshojë emblemën javën e shkuar, gjatë kohës që po ndodh një krizë parlamentare.
Që nga zgjedhjet e përgjithshme dhe presidenciale të mars-prillit, opozita, e drejtuar nga Social Demokratët, SDSM, ka refuzuar të shkojë në parlament, duke e akuzuar qeverinë se ka fituar zgjedhjet me mashtrim.
Partia Demokratike e Shqiptarëve, DPA, një tjetër parti opozitare, ka hedhur poshtë emblemën e re të propozuar dhe e ka akuzuar kundërshtaren e saj nga kampi shqiptar, Bashkimin Demokratik për Integrim, BDI, që është në qeveri, se i është nënshtruar dëshirës së Gruevskit.
“Ky është një tjetër projekt antishqiptar që po aplikohet si shprehje e nënshtrimit të BDI ndaj partnerit të saj në qeverisje,” tha Bekim Fazliu, një legjislator i DPA.
Megjithatë ai pranoi se DPA, me vetëm shtatë nga 123 vende në parlament, mund të bëjë pak gjë për të kundërshtuar planin.
Emblema e re pret të miratohet nga parlamenti. Duhet të ketë mbështetjen e të paktën 82 nga 123 anëtarëve të parlamentit, që në teori partitë qeverisëse e kontrollojnë.
Qeveria javën e shkuar befasoi shumë persona kur lajmëroi vendimin për të ndryshuar stemën.
Mburoja e re ka një kurorë me gurë të çmuar në krye që përmban elementë nga fortesa e Kale e Shkupit. Emblema ngjason edhe me atë të partisë VMRO DPMNE, që ka gjithashtu një luan të verdhë në një mburojë të kuqe.
Stema aktuale e Maqedonisë është një version i rishikuar i një steme të miratuar më 27 korrik, 1946, nga Republika Popullore e Maqedonisë, që ishte pjesë e Jugosllavisë Socialiste.
Në të shfaqen dy kërcenj të përkulur gruri, gjethe duhani dhe fruta lulëkuqe, të gjitha karakteristike në Maqedoni, të lidhura me një fjongo dhe të dekoruara me motive tradicionale të folkut maqedonas.
Në qendër, stema paraqet male, liqene dhe një lindje dielli.
Në vitin 2009, qeveria e Gruevskit e ndryshoi stemën duke hequr yllin e kuq që simbolizonte komunizmin, nga qendra.