Një gjykatë e apelit ka marrë një vendim për gazetarin Tomislav Kezarovski, burgosja e të cilit ngriti shqetësime për lirinë e medias, por nuk pranoi t’i publikonte ato derisa procedurat burokratike të përmbusheshin.
Gjykatësi në Gjykatën e Apelit të Shkupit, Safet Kadriu i tha BIRN të hënën se vendimi për apelimin e Kezarovskit ndaj katër vite e gjysmë viteve burg ishte marrë por duhej të verifikohej formalisht përpara se të publikohej.
Kadriu tha se tani gjykata duhet të përgatisë vendimin dhe t’ia dorëzojë atë Gjykatës Penale të Shkupit për verifikim.
“Është e vërtetë. Vendimi është marrë. Është në fazën përgatitore dhe do të dorëzohet në Gjykatën Penale të shkallës së parë të Shkupit. Nuk mund të themi gjë për vendimin derisa të verifikohet dhe kjo do të ndodhë sipas ligjit brenda 60 ditëve,” tha Kadriu për BIRN.
Megjithatë gjykatësi tha se ai priste që vendimi të shpallej më herët se atëherë, ndoshta brenda një jave, për shkak të interesit të madh të publikut për çështjen.
Pesë gjykatës të apelit mund të vendosin për dënimin me burg, që do të thotë rigjykim ose miratim. Ata mund të dorëzojnë gjithashtu, një vendim të ndryshëm.
Gazetari investigativ u burgos në tetor 2013 për zbulimin e identitetit të një dëshmitari të mbrojtur në një gjyq për vrasje.
Kezarovski kaloi gjashtë muaj në paraburgim në Shkup dhe më pas u lirua me arrest shtëpie, ku ai ka qëndruar që atëherë.
Dënimi i tij me burg dhe periudha e gjatë e paraburgimit tërhoqi shumë kritika, nxiti pretendime se qeverisja e Nikola Gruevskit po përpiqet të shtypë lirinë e medias. Ajo mohoi çdo përfshirje në çështje.
Në një deklaratë të përbashkët në tetor, Federata Ndërkombëtare e Gazetarëve dhe Federata Europian e Gazetarëve i nxitën autoritetet të sigurohen që ‘të gjitha akuzat absurde’ mbi Kezarovskin të bien që të prevalojë drejtësia dhe liria e shprehjes së mendimit.
“Tomislav Kezarovski po dënohet pa të drejtë për mbështetjen dhe mbrojtjen e burimeve dhe profesionit të tij,” tha presidenti i IFJ Jim Boumelha, i cili vizitoi Kezarovskin dhe familjen e tij në mars për të shprehur solidaritetin nga unionet botërore të medias.
“Ne kërkojmë që drejtësia të vihet në vend që Tomislav të dalë nga ky makth si një njeri i lirë,” shtoi Boumelha.
Gjyqi i gazetarit ndodhi në periudhën e mbylljes së papritur të medieve kritike ndaj qeverisë në Maqedoni.
Mbylljet sollën shqetësim për lirinë e shtypit në vend. Që prej vitit 2011, Komisioni Europian në raportet e përvitshme të progresit ka theksuar se liria e fjalës është një prej zonave kyçe që Maqedonia duhet të përmirësojë.
