Gjashtë anije dhe 5 helikopterë po përpiqen të shpëtojnë 478 pasagjerët e “Norman Atlantic”, 22 prej të cilëve janë shqiptarë. Ministria e Mbrojtjes: Të gjithë pasagjerët janë mbledhur në bashin e anijes, lëvizja është e pamundur për shkak të motit të keq dhe zjarrit
Qindra pasagjerë kanë mbetur të bllokuar për orë të tëra në bordin e tragetit italian “Norman Atlantic”, që u përfshi nga flakët herët në mëngjes në afërsi të Korfuzit në Greqi.
Italia, Greqia dhe Shqipëria kanë nisur prej orës 6:50 të mëngjesit të së dielës operacionin për shpëtimin e 487 personave në bord, ndërsa një person raportohet të ketë humbur jetën, pasi ra në det gjatë evakuimit.
“Norman Atlantic” po lundonte përmes një deti të trazuar nga moti i keq nga Igumenica në drejtim të Ankonës, kur në hangarin e tragetit u shfaqen flakët e para.
12 orë më pas, anija ka ngecur në kufi të ujërave detare shqiptare, rreth 6 milje larg ishullit të Sazanit në Vlorë.
“Anija është ende në gjendje lundrimi, por për shkak të humbjes së energjisë e ka të pamundur të lëvizë. Të gjithë pasagjerët janë mbledhur në bashin e anijes dhe po vazhdon evakuimi i tyre,” tha komandanti i Rojes Bregdetare, Xhemal Shkurti në një deklaratë për mediat.
Trageti në rrezik mbytjeje është i rrethuar nga 6 anije shpëtimi, mes së cilave edhe anija shqiptare “Butrinti”, e cila është angazhuar në shuarjen e flakëve dhe shpëtimin e njerëzve të mbetur në bord.
Zyrtari i Ministrisë së Mbrojtjes nuk përmendi një shifër të saktë mbi pasagjerët e evakuuar, pasi situata ndryshon minutë pas minute. Por mediat greke dhe ato italiane raportuan për 158 persona të shpëtuar deri në orën 14, ndërsa pjesa tjetër është ende e rrezikuar mes zjarrit që vazhdon të kërcënojë anijen dhe motit të keq.
Përveç anijeve të shpëtimit, në vendin e ngjarjes ndodhen edhe 5 helikopterë “Puma” të dërguar nga Italia dhe Greqia, ndërsa mes tre shteteve po vazhdojnë komunikimet e nivelit më të lartë për të mbyllur pa pasoja operacionin.
Kryeministri Edi Rama i ofroi gjithë ndihmën e tij homologut grek, Samaras, ndërsa ministri i Brendshëm, Saimir Tahiri zhvilloi një bisedë telefonike me homologun italian, Alfano.
“Kemi vënë në dispozicion të gjitha kapacitetet tona, ndërsa bazat detare të Durrësit, Pashalimanit dhe Sarandës janë në gatishmëri të plotë,” tha Gjeneral Shkurti.
Sipas tij, rreziqet e operacionit të shpëtimit shtohen nga nata e ftohtë dhe zjarri në bord, që vazhdon të jetë i përhapur në bordin e tragetit “Norman Atlatic”.
Pjesa më e madhe e 478 pasagjerëve të tragetit janë grekë, por nuk mungojnë edhe kombësitë e tjera. Ministria e Jashtme shqiptare tha përmes një deklarate se 22 prej tyre mbajnë pasaporta shqiptare, edhe pse dyshohet se numri është më i lartë.
Drejtuesit e operacionit të shpëtimit kanë disa skenarë për të shmangur humbjen e jetëve njerëzore, njëri prej të cilëve është zhvendosja e anijes në drejtim të brigjeve shqiptare.
Por përpjekjet për zhvendosjen e anijes me rimorkiatorë nuk kanë rezultuar të suksesshëm për shkak të motit të keq.
“Ende nuk është vendosur nëse anija do të zhvendoset në drejtim të brigjeve tona apo jo. Ne jemi në gatishmëri dhe kemi marrë të gjitha masat për trajtimin e pasagjerëve, nëse kjo ndodh,” tha gjeneral Shkurti.
