Banka Qëndrore Europiane pritet të nisë për herë të parë “lehtësimin sasior” ose printimin e parave si masë antikrizë. Kjo pritshmëri sakaq e dërgoi euron në nivelin më të ulët në mbi katër vjet kundrejt dollarit.
Monedha e përbashkët europiane Euro ra në 1.2035 dollarë gjatë ditës së premte në bursat botërore, duke shënuar nivelin më të ulët të këmbimit në mbi katër vjet e gjysmë, bën të ditur agjencia e lajmeve Reuters.
Rënia e euros erdhi si pasojë e faktit që tregtarët dhe investitorët po binden gjithnjë e më shumë se Banka Qëndrore Europiane do të vendosë më 22 janarin e ardhshëm për herë të parë të ndjekë politikën e “lehtësimit sasior”, gjë që nënkupton emetim shtesë të eurove për të blerë tituj borxhesh të vendeve të jugut të eurozonës.
Ndërsa Rezervat Federale në SHBA apo banka qendrore e Japonisë kanë vite që kanë rritur masën monetare në qarkullim me synimin për të lehtësuar krizën ekonomike përmes rritjes së inflacionit, por Banka Qëndrore Europiane nuk e ka bërë ende asgjë të tillë dhe pritet ta bëjë për herë të parë këtë muaj duke shënuar një ndryshim themelor në politikën e saj të deritanishme.
Analistë të cituar nga Reuters thonë se Euro mund të dobësohet edhe më tej përballë dollarit dhe monedhave të tjera ndërkombëtare.
Leku shqiptar ndjek euron në kuotimin kundrejt monedhave të tjera, gjë që është reflektuar me forcimin e dollarit kundrejt lekut gjatë muajve të fundit.
Gjatë vitit 2014, Euro qëndroi në kuotën 140 lekë me luhatje shumë të vogla. Sipas të dhënave të Bankës së Shqipërisë, në fund të vitit 2014 euro kushtoi mesatarisht 140.1 lekë ndërsa në dhjetor 2013 kushtonte 140.2 lekë.
Ndërkohë, kundrejt dollarit, leku është nënçmuar me 13 për qind që nga fillimi i vitit ku nënçmimi më i madh ndodhi gjatë muajve gusht dhe shtator. Dollari kushton sot 115.2 lekë nga 101.9 lekë që kushtonte në dhjetor 2013.
Banka e Shqipërisë përdor si referencë të ecurisë së lekut një “shportë monedhash” e cila përbëhet në masën 80 për qind nga euro dhe 20 për qind nga leku. Përballë kësaj shporte, leku është dobësuar me afro 2 për qind përgjatë vitit 2014.
