Bankers Petroleum njoftoi se ka pezulluar një pjesë të shpimeve të reja ndërsa aksionet e Petromanas në bursë humbën mbi 90 për qind të vlerës gjatë muajve të fundit.
Rënia dramatike e çmimit të naftës në bursat ndërkombëtare gjatë muajve të fundit goditi të ardhurat dhe planet e investimeve të kompanive naftënxjerrëse në Shqipëri si dhe rrëzoi aksionet e këtyre kompanive në bursë.
Bankers Petroleum, kompania kryesore e nxjerrjes së naftës në Shqipëri njoftoi se ka pezulluar punën e dy pajisjeve të shpimit nga gjashtë që ka gjithsej ndërsa do të pezullojë punën në një të tretë gjatë janarit. “Kompania do të vijojë të shpojë duke përdorur tri pajisje të tjera dhe planifikon të hapë 85-90 puse të reja horizontale në vitin 2015 në varësi të çmimeve të naftës,” njoftoi kompania në një deklaratë për shtyp të martën, ku paraqiti rezultatin e punës për tremujorin e katërt të vitit 2014.
Sipas Bankers, prodhimi u rrit me 14 për qind në tremujorin e katërt në krahasim me një vit më parë duke arritur në 20,687 fuçi në ditë mesatarisht. Por çmimi me të cilin Bankers shet naftën e vet ra në 57 dollarë për fuçi nga 78.5 dollarë që qe në tremujorin e tretë të vitit 2014.
Sipas agjencisë së lajmeve Bloomberg, çmimi i aksioneve të Bankers Petroleum në bursën e Torontos ka rënë në 3 dollarë aktualisht duke u përgjysmuar në krahasim me çmimin që këto aksione kishin në gushtin e kaluar, kohë kur nisi edhe rënia drastike e çmimit të naftës në tregun ndërkombëtar.
Çmimi i naftës në tregun ndërkombëtar është përgjysmuar gjatë pesë muajve të fundit ku çmimi referencë për Europën BRENT, ka rënë nga 110 dollarë për fuçi në gati 50 dollarë për fuçi si pasojë e refuzimit të Arabisë Saudite për të ulur prodhimin e vet pavarësisht rënies së çmimeve.
Nafta shqiptare ka kosto të lartë prodhimi për shkak vështirësisë në nxjerrje dhe rënia e çmimeve ndërkombëtare në këto nivele pritet të ulë investimet e nevojshme për të mbajtur prodhimin e lartë.
Ndërkohë, aksionet e kompanisë tjetër Petromanas kanë rënë nga 0,4 dollarë për njësi në 0.05 dollarë, duke reflektuar rënien e perspektivës për këtë kompani. Petromanas është një kompani e zotëruar nga gjiganti ndërkombëtar i naftës SHELL, e cila është në fazë shpimi në zonën ë Shpiragut në Berat. Kompania synon të nxjerrë naftë bruto nga thellësi të konsiderueshme prej mbi 5 mijë metra.
Lajme të tjera me interes:
