Politikanët, gazetarët dhe njerëzit e zakonshëm kudo në vendet e Ballkanit kanë bërë nderimet e tyre për viktimat e sulmit terrorist islamik në Paris, ku vdiqën 12 persona.
Në Serbi, vendasit, përfshirë gazetarët u mblodhën në mbrëmjen e të mërkurës përpara ambasadës franceze në Beograd në nder të stafit të Charlie Hebdo – gazetës satirike që u gjend në qendër të skenës së përgjakur në Paris.
Rreth 40 persona ndezën qirinj dhe shprehën respektin e tyre për 12 viktimat e sulmit, ku përfshihen tetë gazetarë dhe dy policë.
Lidhja e Pavarur e Gazetarëve të Serbisë, NUNS, i ftoi gazetarët dhe qytetarët të mblidhen të enjten në orën 6 të pasdites përpara Qendrës Kulturore Franceze në Beograd për të treguar mbështetje për viktimat dhe për të protestuar kundër terrorizmit.
Në kryeqytetin e Shqipërisë, Tiranë, njerëzit u mblodhën të mërkurën për të ndezur qirinj dhe për të shprehur ngushëllimet e tyre. Gazetarët shqiptarë mbajtën një ceremoni të vogël, ku ndezën qirinj në solidaritet të kolegëve francezë.
Ambasadori francez në Tiranë, Bernard Fitoussi dhe ministri i jashtëm shqiptar, Ditmir Bushati, iu bashkuan ceremonisë të mbajtur pranë qendrës së qytetit. “Franca është e plagosur, por ne do të ngrihemi sërish,” tha Fitoussi.
“Ne në Shqipëri e dimë pothuajse më mirë se kushdo tjetër çmimin e lartë të lirisë së shprehjes. Askush nuk mund të ndalojë atë,” shtoi ai.
Në kryeqytetin e Kosovës, në Prishtinë, disa qindra qytetarë u mblodhën përpara Teatrit Kombëtar në qendër të qytetit për të treguar solidaritet me viktimat e të shtënave në Paris.
Kreu i parlamentit të Kosovës, Kadri Veseli, ishte mes atyre që ndezën qirinj në shkallët e teatrit.
Në Bosnje dhe Hercegovinë, gazetarët dhe qytetarët planifikuan të mblidhen përpara ambasadës franceze në Sarajevë të enjten pasdite për të ndezur qirinj dhe për të vendosur lapsa në kujtim të karikaturistëve francezë.
Presidenca tripalëshe lëshoi të mërkurën në mbrëmje një deklaratë ku dënonte sulmin dhe shprehte ngushëllime për familjarët e të vdekurve dhe për shtetin Francez.
“Ky nuk është vetëm një sulm mbi zyrën e kësaj gazete, apo në Francë, por është një sulm mbi të gjithë botën e lirë dhe demokratike,” tha presidenca.
Në kryeqytetin kroat, Zagreb, vendasit filluan të vinin lule dhe të ndiznin qirinj si akt i solidaritetit dhe ngushëllimeve.
Iniciativa Rinore për të Drejtat e Njeriut, YIHR, një ojq, tha se do të organizonte një mbledhje në orën 3 të pasdites në Sheshin e Republikës Franceze në Zagreb.
Në Maqedoni, kryeministri Nikola Gruevski, dërgoi një telegram ngushëllimi te homologu i tij francez, Manuel Valls, ku dënonte ‘këtë akt terrorist”, që ai e quajti një akt kundër integritetit dhe vlerave demokratike.
Ali Ahmeti, kreu i partisë etnike shqiptare Bashkimi Demokratik për Integrim BDI, tha: “Jam i bindur se pas këtij sulmi hajvan Franca do të mbetet e fortë dh do të jetë më lart sesa përpjekjet e vrasësve për të mbjellë urrejtje mes njerëzve.”
Një peshkop i kishës ortodokse, Kiril, tha se fundamentalistët nuk ia dolën të kuptojnë fenë e tyre.
“Nëse nuk je në gjendje të qeshësh në lidhje me besimin tënd të pakët apo me mungesën e tij, atëherë ke një problem serioz me kuptimin dhe diçka nuk është në rregull,” tha peshkop Kiril.
“Fundamentalistët vrasin duke menduar se po bëjnë një sakrificë. Atyre, i rekomandoj të rilexojnë librat origjinalë që nuk e lejojnë vrasjen në emër të Zotit,” vëzhgoi peshkopi.
Vajtime të përbashkëta për stafin e Charlie Hebdo po mbahen në të gjithë botën.
