Studentët dhe profesorët që kundërshtojnë planin për provime të jashtme të mbikëqyrura nga shteti për të diplomuarit po e nxitin presidentin të vërë veton në projektligjin polemik.
Teksa një projektligj i debatuar mbi edukimin e lartë hyn në shqyrtimin e dytë në parlamentin e Maqedonisë këtë javë, studentët që protestojnë dhe profesorët i kanë bërë apel presidentit Gjorge Ivanov, një ish-profesor i shkencave politike – t’i japi fund heshtjes së tij.
“Pyetja i është dërguar presidentit por nuk kemi ende përgjigje,” tha Aleksandar Cocevski, zyrtar i marrëdhënieve me shtypin te presidenti, duke ngjallur pasiguri nëse Ivanov do të përdorë apo jo fuqinë e tij për të vënë veton mbi reformën.
Profesorët në protestë dhe studentët këtë javë i shkruan presidentit dhe i kërkuan atij të pengojë ligjin, gjithashtu lançuan një peticion online për të njëjtin qëllim.
Të premten, projektligji hyri në një shqyrtim të dytë nga komisioni arsimor i parlamentit pas të cilit do të diskutohet në një seancë parlamentare. Me shumë gjasa do të miratohet pasi partitë qeverisëse kanë shumicën e vendeve në parlament.
“Ne nuk kemi iluzione se projektligji nuk do të miratohet në parlament sepse ata kanë treguar se nuk kanë dëshirë të dëgjojnë kundërshtimet tona,” tha Vladimir Delov, nga lëvizja informate e studentit, Plenumi i Studentit, që organizoi protesta kundër reformës në muajin e shkuar.
Megjithatë, “Ivanov ka qenë profesori ynë dhe besojmë se ai do të na kuptojë dhe do të përdorë mundësinë e vetos mbi ligjin,” shtoi Delov.
Përpara se të bëhej president i Maqedonisë, Ivanov ishte profesor i shkencave politike në Fakultetin shtetëror të Drejtësisë në Shkup.
Studentët dhe profesorët thanë se nëse ligji miratohet atëherë ata do të bëjnë më shumë protesta dhe aktin civil të mosbindjes, që mund të përfshijë bojkotimin e orëve të mësimit.
Të enjten, i ashtuquajturi Plenumi i Profesorëve i shkroi Komisionerit Europian për Arsimin, Tibor Navracsics dhe Komisionarit Evropian për Zgjerim, Johannes Hahn, ku i kërkuan mbështetje.
Reforma, shkruan rreth 500 profesorë nga plenumi, shkel parimet bazë dhe dëmton rëndë autonominë e universiteteve.
Qeveria e kryeministrit Gruevski këmbëngul se reforma do të përmirësojë cilësinë e edukimit të lartë dhe ka fajësuar social demokratët për organizimin e protestave.
Mediat pro-qeveritare kanë nisur një fushatë kundër profesorëve që mbështesin studentët, duke i akuzuar ata si përtacë dhe të trembur nga reformat që kërcënojnë pozicionet e tyre ose që janë të lidhur politikisht me partitë opozitare.
