Kolinda Grabar Kitarovic përshëndet ‘fitoren e patriotizmit’, Josipovic pranon humbjen me mirësjellje, por kryeministri kroat e ka akuzuar atë se ka drejtuar një fushatë “sektare”
Presidentja e re kroate përshëndeti fitoren e saj surprizë në zgjedhjet presidenciale të së dielës.
Duke iu drejtuar “të dashurve burra dhe gra nga e gjithë Kroacia, Bosnja dhe Hercegovina dhe nga e gjithë bota,” ajo foli për këtë “natë të mrekullueshme në të cilën arritëm një fitore për koalicionin tonë patriotik dhe atdheun e dashur”.
Grabar Kitarovic theksoi bashkimin e të gjithë qytetarëve, përfshirë votuesit e Josipovic dhe falënderoi kandidatët e tjerë presidencial të raundit të parë, Milan Kujundzic dhe Ivan Vilibor Sincic.
“Ne të gjithë duam një Kroaci më të mirë, ne duhet të përqendrohemi në atë që ka rëndësi: në jetën e kroatëve në Kroaci,” tha ajo.
“Ju ftoj të gjithëve të bashkoheni dhe i nxis ata që kanë votuar për Josipovic të jenë pjesë e skuadrës sonë, sepse ka pasur mjaft ndarje, mjaft ‘e jona dhe e jotja’; ju jeni të mitë, bashkohuni; le të bashkojmë patriotizmin tonë,” tha Grabar Kitarovic.
“Një detyrë na pret, do të punojmë në përfitim të Kroacisë sonë të dashur,” përfundoi ajo, ndërsa përsëriste fjalët “bashkim” dhe “atdhe”.
Ivo Josipovic, kandidati i mundur në zgjedhjet presidenciale, ndërkohë pranoi humbjen e tij dhe uroi kundërshtaren për fitoren e papritur.
“Më lejoni të uroj fitoren e presidentes së sapozgjedhur Kolinda Grabar Kitarovic,” tha ai.
Kryeministri dhe lideri social demokrat Zoran Milanovic, përcolli një ton tjetër, duke e akuzuar Grabar Kitarovic për fushatë ‘sektare’.
“Grabar Kitarovic e përfaqësoi veten si një ushtare militante e partisë së saj. Kjo ishte një fushatë me shtatë fjali, që ajo vazhdoi t’i përsëriste”, tha Milanovic, duke shtuar se ai ishte i vetëdijshëm se partitë qeverisëse kishin qenë barrë për shanset e Josipovic.
Ministrja e jashtme Vesna Pusic, kryetare e Partisë Popullore Kroate, uroi Grabar Kitarovic për fitoren e saj por e këshilloi atë të mos sillej si një presidente që vjen prej krahut më konservator të HDZ.
“Ajo duhet të bashkojë vendin” tha Pusic.
“Nëse ajo nuk është në gjendje ta bëjë këtë, atëherë ajo do të tundojë partinë e saj të përpiqet të destabilizojë vendin” shtoi Pusic. “Çfarë ajo mbrojti, një kthim në nacionalizmin e 1990, nuk ka vend tani në Kroaci”.
Presidenti i HDZ, Tomislav Karamarko, ishte i pari që foli në selinë e Grabar Kitarovic duke filluar me “ne kemi një presidente”.
“Partia më e fortë kroate, që u drejtua nga Dr Franjo Tudjman, kroati më i madh i shekullit 20, që krijoi shtetin kroat, tani ka presidenten e Republikës,” tha ai, duke iu referuar liderit më të fundit të Kroacisë së pavarur.
“Ajo është një presidente që jo vetëm do të jetë një eksponent në HDZ në Pantovcak [rezidencën presidenciale], por do të punojë me qeverinë e ardhshme kroate që do të krijohet në fund të vitit për dobi të njerëzve të Kroacisë,” shtoi Karamarko, duke parashikuar fitoren e HDZ në zgjedhjet parlamentare në fund të 2015.
Në rajon, Nermina Kapetanovic, një deputete boshnjake, nga Partia Myslimane e Veprimit Demokratik, SDA, tha se SDA ka një arsye për të qenë e kënaqur me rezultatin e zgjedhjeve në Kroaci.
Si HDZ dhe SDA i përkasin Partisë Popullore Europiane EPP, parti e qendrës së djathtë që mbledh mbi 70 parti kombëtare nga 40 shtete, citoi ajo.
Fitorja e Grabar Kitarovic ishte gjithashtu e rëndësishme sepse kroatët treguan se ishin gati t’i jepnin një mundësi një gruaje, duke thyer paragjykimet, gjë që mund t’i inkurajojë votuesit boshnjakë të bëjnë të njëjtën gjë në të ardhmen.
Duke folur për Bosnjën, ajo tha se shpresonte që presidentja e re nuk do të përqendrohej vetëm në komunitetin etnik kroat në Bosnjë.
“Grabar Kitarovic i bëri premtime direkte kroatëve të Bosnje-Hercegovinës, por unë mendoj se çështjet e kroatëve duhet të zgjidhen në Bosnjë-Hercegovinë dhe ne të gjithë duhet të përkushtohemi që t’i zgjidhim ato,” tha Kapetanovic.
“Si një anëtare e BE-së, Kroacia duhet të ndihmojë Bosnje-Hercegovinën në proces, por jo vetëm kroatët, të gjithë vendin.”
Pero Nikic, lideri i HDZ 1990 në Bosnje, simotër e partisë HDZ, tha se partia e tij priste që Kroacia të vazhdojë të veprojë si një garanci e Marrëveshjes Dayton të 1995, që i dha fund luftës 3-vjeçare në Bosnje.
“Ne besojmë që… Kroacia do të marrë një rol më aktiv në BE në procesin e rrugës së Bosnje-Hercegovinës drejt Bashkimit Europian,” tha Nikic.