Në një deklaratë për gazetarët ambasadori i ri Shteteve të Bashkuara të Amerikës, Donald Lu, nënvizoi që xhihadistët që kanë luftuar në Siri dhe janë kthyer në atdhe përbëjnë rrezik për sigurinë.
“Shtetet e Bashkuara janë të shqetësuara për luftëtarët e huaj që marrin pjesë në konfliktin në Siri dhe kërcënimin që paraqesin kur kthehen në vendet e tyre të origjinës,” tha Donald Lu.
“Ne po punojmë me Shqipërinë dhe me shumë partnerë të tjerë me të cilët ndajmë partneritete të forta në luftën kundër terrorizmit për të bashkërenduar përpjekjet për ta zbutur këtë kërcënim,” shtoi ai.
Që prej nisjes së konfliktit, 10 shqiptarë kanë humbur jetën në Siri dhe 30 të tjerë janë kthyer në atdhe, përpara hyrjes në fuqi të ligjit që i dënon ata për bashkëpunim me terroristët.
Në muajit shkurt Prokuroria e Krimeve të Rënda në Tiranë, arrestoi 8-të dyshuar, përfshirë dy imamë, si pjesë e një rrjeti i cili besohet që ka organizuar dhe financuar rekrutimin e xhihadistëve shqiptar që luftojnë në Siri.
Rreth 90 militantë Shqiptarë, një pjesë me familjet e tyre, u nisën drejt Sirisë gjatë viteve 2012-2014, me bindjen se do të bëheshin pjesë e një lufte të shenjtë.
Sipas dokumenteve të siguruara nga BIRN, rreth 50 prej tyre, të identifikuar tashmë nga autoritetet e sigurisë vazhdojnë të jenë pjesë e konfliktit.
Lu tha që lufta kundër terrorizmit dhe ekstremizmit mbetet një nga fushat e qarta për bashkëpunim më të madh me partnerët nëpër botë, duke shtuar që sulmi në Paris kundër gazetës satirike Charlie Hebdo ishte një sulm kundër vlerave të përbashkëta.
“Sulmi ndaj Charlie Hebdo në Paris nuk ishte vetëm një sulm ndaj njerëzve të pafajshëm,” tha Lu. “Ishte kundër vlerave demokratike dhe asaj mënyre jetese që SHBA dhe Franca punojnë së bashku për t’i promovuar kudo në botë,” shtoi ai.
