Ndërkohë që kryeministri shqiptar nxitoi ti bënte homazh revistës satirike “Charlie Hedbo,” kritikët e tij thonë që ai po bën shumë pak për të mbrojtur lirinë e medias në vend.
Të dielën kryeministri Edi Rama iu bashkua 40 liderëve nga e gjithë bota të cilët marshuan në Paris në shenjë uniteti kundër sulmeve terroriste ndaj revistës satirike Charlie Hedbo dhe një supermarket hebre, në të cilat 17 njerëz u vranë, përfshirë 10 gazetarë.
Përpara se të nisej në Paris si kreu i një delegacioni që përfshinte ministrin e jashtëm dhe të mirëqenies sociale, si dhe lider religjioz dhe gazetarë, Rama postoi në llogaritë e tij në rrjetet sociale sloganin “Je suis Charlie.”
Kryeministri shqiptar i bëri gjithashtu një homazh karikaturistëve të vrarë duke vendosur tre lapsa, me ngjyrën të kuqe, blu dhe të bardhë- që simbolizojnë flamurin francez- në xhepin e xhaketës së tij gjatë marshimit, gjë që tërhoqi vëmendjen e medias ndërkombëtare.
Megjithatë; homazhi i tij dhe pse i zgjuar, është kritikuar nga disa analistë në Shqipëri si hipokrit, duke u bazuar në faktin që liria e medias në vend është gjithashtu e rrezikuar, e kufizuar në një treg të vogël ku ndërhyrjet politike ndaj linjës redaksionale janë shumë të përhapura.
Sipas organizatës Reporters Without Borders Shqipëria është një vend me media pjesërisht të lirë, ku presioni politik dhe ai ekonomik rëndon mbi punën e përditshme të gazetarëve.
Sipas shkrimtarit dhe analistit Fatos Lubonja, sjella e Ramës në Paris është konsistente me praktikën e politikanëve në rajon, te cilët tregojnë një fytyrë në shtëpi dhe një tjetër për botën jashtë.
“Marshimi i kryeministrit tonë në emër të lirisë së shprehjes bën pjesë në gjuhën e dyfishtë që kanë mësuar tashmë mjeshtërisht politikanët e rajonit- një gjuhë për Brukselin, për të kërkuar legjitimitetin jashtë vendit dhe një gjuhë brenda përbrenda vendit, që shtyp dhe manipulon lirinë e shprehjes,” Lubonja i tha BIRN-it.
“Në Shqipëri, sipas mendimit tim, siguria dhe fjala e lirë janë edhe sot të kërcënuara jo nga islamikët, por nga dy kasta në pushtet që kanë ndërtuar më shumë atë që mund të quhet shtet i mafies sesa shtet ku ka edhe mafia,” shtoi ai.
