Sekretari amerikan i Shtetit John Kerry mbërriti në Bullgari sot me misionin për të nxitur Sofien të mbështetet më pak në energjinë e Rusisë si dhe të luftojë korrupsionin.
Bisedimet mes Kerryt – i shoqëruar nga Asistent Sekretarja e Shtetit Victoria Nuland – dhe presidentit të Bullgarisë Rosen Plevneliev, kryeministrit Boyko Borisov dhe Ministrit të Jashtëm Daniel Mitov synojnë të theksojnë angazhimin e Uashingtonit në ndihmë të Bullgarisë që kjo e fundit t’i rezistojë ndikimit të Rusisë.
Bullgaria varet nga Rusia për 85 për qind të gazit që konsumon si dhe për të gjithë energjinë bërthamore që prodhon ndërkohë që kompania ruse Lukoil ka nën pronësi rafinerinë e vetme të vendit.
Aneksimi i Krimesë nga ana e Rusisë dhe mbështetja e Moskës për separatistët prorusë në Ukrainën e lindjes ka rritur shqetësimet mes vendeve që varen nga energjia e Rusisë. Zyrtarët e SHBA-së besojnë se vendi i mbushur me korrupsion është veçanërisht i dobët përballë ndikimit nga Rusia, e cila dominoi punët e brendshme dhe të jashtme të Bullgarisë përgjatë shumë dekadave gjatë Luftës së Ftohtë, kur Bullgaria konsiderohej si sateliti më besnik i Bashkimit Sovjetik.
Anulimi i papritur nga ana e Rusisë të projektit për gazsjellësin e Rrymës së Jugut, i cili duhej të kalonte përmes Bullgarisë, ka rritur dëshirën e Sofies për t’u zhvilluar si një qendër rajonale për gazin.
Uashingtoni mbështet ndërtimin e një gazsjellësi mes Greqisë dhe Bullgarisë, gjë që do ta lidhë Bullgarinë me Projektin e Gazsjellësit Transadriatik, duke ofruar gazin e Azerbajxhanit si një alternativë ndaj energjisë së Rusisë.
