Përleshje në protestën kundër ministrit serb të Kosovës

Policia arrestoi 22 protestues pas përleshjeve në mitingun që kërkonte dorëheqjen e ministrit Aleksandar Jablanovic, i cili akuzohet se ofendoi shqiptarët që bllokuan pelegrinët serbë në Krishtlindjet Orthodokse.

Përleshjet shpërthyen të premten kur shumë protestues të zemëruar u mblodhën para Ministrisë së Kthimeve dhe Komuniteteve në Prishtinë për të kërkuar dorëheqjen e ministrit, Aleksandar Jablanovic.

“Tetë policë dhe 31 protestues u plagosën,” tha zëdhënësi i policisë Agron Borovci për BIRN. Dy automjete u dëmtuan, shtoi Borovci.

Partia nacionaliste Vetevendosje organizoi manifestimin pasi Jablanovic i cilësoi protestuesit shqiptarë të cilët hodhën dëborë ndaj pelegrinëve serbë që po vizitonin një kishë në Gjakovë gjatë Krishtlindjeve Orthodokse si “barbarë”.

Gjakova qe skenë luftimesh të ashpra mes forcave të Jugosllavisë dhe Ushtrisë Çlirimtare të Kosovës gjatë luftës, kur shumica e shqiptarëve të Kosovës u përzunë dhe shumë civilë u vranë. Pasi konflikti përfundoi, të gjithë serbët u përzunë nga e njëjta zonë.

Qindra njerëz manifestuan për dorëheqjen e Jablanocvic edhe në qytetin e Pejës të premten, duke mbajtur banderola me slogane të tilla si “Jablanovic jashtë” dhe “Mos fyej nënat tona”.

Një grup i studentëve të Universitetit të Prishtinës protestuan kundër Jablanociv të enjten duke varur fotografi të mëdha të viktimave të luftës në gardhin jashtë ministrisë së tij.

Fotografitë u nxorrën në përgjigje të pretendimit që Jablanovic shfaqi në një televizion të Kosovës ku tha se ai nuk kishte dijeni për krime lufte të kryera në Gjakovë.

“Gjatë kohës së luftës unë isha 17-18 vjeç dhe nuk kam qenë kurrë në Gjakovë. Nuk e di se si duhet të di se çfarë ndodhi. Ata që e përjetuan luftën duhet të flasin për të”, tha Jablanovic në televizionin KTV të hënën.

Jablanovic tha gjithashtu se ai nuk kishte dijeni për masakrat e kryera nga policia dhe ushtria e Serbisë në Kosovë.

“Nuk e di. Më besoni, nuk e di,” tha ai.

Një protestë tjetër kundër Jablanovic u zhvillua në Fushë-Kosovë të premten, organizuar nga shoqata e të zhdukurve të luftës.