E shqetësuar nga situata e vështirë e mijëra huamarrësve me kredi në franga zvicerane, Kroacia ka vendosur të fiksojnë këmbimin valutor në kuna për një vit sipas vlerës së javës së shkuar.
Kroacia ka ndërhyrë për të ndihmuar huamarrësit me kreditë e shtrenjta në rritje në franga zvicerane duke ngrirë vlerën e këmbimit për një vit.
Që nga e enjtja e shkuar, kursi i këmbimit të frangës në kunën kroate është rritur me rreth 20 për qind.
Rritja ndodhi pasi Banka Kombëtare e Zvicrës braktisi tavanin që kishte parandaluar frangun nga rritja kundrejt euros përtej një pike të veçantë.
Një rritje e ngjashme në frangë në fillim të 2009 la shumë huamarrës në pamundësi për të vazhduar pagesat e kredive e makinave dhe shtëpive që kishin marrë në franga.
Kryeministri kroat Zoran Milanovic të hënën në mbrëmje tha se franga do të fiksohet në nivelin që kishte përpara rritjes së papritur të së enjtes në -6.39 kuna për një frangë.
“Kostoja e barrës do të bjerë mbi institucionet financiare,” komentoi Milanovic, duke iu referuar bankave.
“Brenda vitit të ardhshëm ne mund të bëjmë diskutime për konvertimin e kredive të lidhura me frangën në kredi me kuna, por kjo do kërkojë miratimin e Bankës Kombëtare Kroate,” shtoi Milanovic.
Qeveria e qendrës së majtë e mori vendimin pas një mbledhje me përfaqësuesit e bankave të biznesit dhe bankës kombëtare, HNB.
Presidenti i lidhjes kroate të bankave, Zoran Bohacek, tha se bankat ishin të gatshme të pranojnë barrën financiare të fiksimit të vlerës së këmbimit valutor për disa muaj, në pritje të një zgjidhje afatgjatë.
“Nëse bankat vetë marrin parasysh se kjo nuk është sinkron me normat ligjore, ato do të vendosin vetë nëse do marrin veprim ligjor,” citoi Duhacek.
Vlera e valutës zvicerane ndërkohë është rritur në 7.66 kuna për një frangë.
Franak, një OJQ e ngritur në 2009 për të ndihmuar kroatët të përballen me kreditë në franga, vlerëson se rreth 60,000 kredi kroate janë të lidhura me frangën, ndaj rritja e fundit e valutës mund të ndikojë potencialisht nga 200,000 deri në 300,000 njerëz në Kroaci.
Sipas HNB, vlera e të gjitha kredive të lidhura me frangën në Kroaci është rreth 3.1 miliard euro. Rreth 2.7 miliard janë kredi private. Hipotekat e lidhura me frangën përfaqësojnë 36.5 për qind të të gjitha kredive të shtëpive në vend.