Kreu themelues i lëvizjes që u bë partia e tretë më e madhe në Kosovë nuk do të rikandidojë për kryetar dhe thotë se do të punojë si aktivist i thjeshtë i Vetëvendosjes.
Albin Kurti, udhëheqësi që një dekadë më parë krijoi Lëvizjen Vetëvendosje, një lëvizje proteste në Kosovë, njoftoi sot se ka vendosur të tërhiqet nga posti i drejtuesit të lëvizjes ndërkohë që do të vijojë të punojë për këtë parti politike si aktivist në bazë.
“Në mbledhjen e fundit të Këshillit të Përgjithshëm të Lëvizjes VETËVENDOSJE! që përfundoi me 11 janar 2015, morëm vendimin që ta vazhdojmë edhe për një vit ristrukturimin nëpër Qendrat tona. Po ashtu, thamë që unë do të kthehem në bazë sepse aty nevojitem më së shumti në një kohë kur Kosovës i nevojitet më së shumti vetëvendosja,” deklaroi Kurti në një njoftim publik për mbështetësit e vet.
Kurti, 40 vjeç, shërbeu si kreu i lëvizjes që nga themelimi i saj në vitin 2004. Lëvizja e njohur për protestat e saj me tone nacionaliste organizoi shumë protesta të mëdha popullore kundër bisedimeve të qeverisë së Kosovës me Serbinë, bisedime të nxitura nga faktori ndërkombëtar me premtimin e normalizimit të marrëdhënieve, por që për Vetëvendosjen qenë imponim i njëanshëm i vullnetit të Serbisë në Kosovë.
Lëvizja Vetëvendosje u kthye në parti politike dhe mori pjesë në zgjedhjet e vitit 2010 ku fitoi afro 13 për qind të votave, ndërkohë që zgjedhjet u konsideruan si të manipuluara në shkallë industriale.
Në zgjedhjet për pushtetin vendor të vitit 2013, Vetëvendosje pati një rezultat të pakënaqshëm në nivel kombëtar por arriti të fitojë komunën e Prishtinës, komuna më e madhe në vend në balotazh, ku Shpend Ahmeti mposhti kreun e partisë Lidhja Demokratike e Kosovës Isa Mustafa me rezultat të ngushtë.
Në zgjedhjet e fundit parlamentare të zhvilluara në vitin 2014, Vetëvendosje arriti të marrë 100 mijë vota, (13.6 për qind) dhe hyri në bisedime me disa parti të tjera të opozitës për të krijuar një qeveri koalicioni. Përpjekjet për të krijuar koalicion kundër kryeministrit në ikje Hashim Thaçi dështuan kur njëra nga partitë e opozitës, Lidhja Demokratike e Kosovës, e braktisi bllokun e opozitës për t’u bashkuar me partinë e Thaçit Partia Demokratike e Kosovës.
Lëvizja Vetëvendosje është një grupim proteste me larmishmëri identitetesh politike por identiteti si parti e majtë po formëzohet gjithnjë e më shumë.
Letra e dorëheqjes së Kurtit nga posti i kryetarit pati tonalitete të forta të politikës së majtë.
“Popullsia si shoqëri është e ndarë në klasa dhe ne përgjithësisht e kemi mbështetjen e klasës së mesme. Sfida jonë vendimtare është mbështetja e domosdoshme nga të varfërit, nga ata që mezi mbijetojnë e kryesisht nuk e kanë as shkollimin e mesëm. E kemi obligim politik e moral, e kemi detyrë shoqërore e kombëtare që t’iu ndihmojmë të varfërve,” tha Kurti në letrën e dorëheqjes.
Lëvizja Vetëvendosje pritet të zhvillojë zgjedhjet e brendëshme gjatë këtij viti nga ku do të përcaktohet edhe kryetari i ardhshëm.
Albin Kurti, i lindur në Prishtinë në vitin 1975, u angazhua në lëvizjen studentore të universitetit të Prishtinës në vitin 1997. Ai u arrestua nga forcat serbe në vitin 1999 dhe u dënua nga një gjykatë serbe dhe u dënua me 15 vite burg nën akuzat për komplot kundër integritetit territorial të Jugosllavisë. Ai u lirua në dhjetor 2001 falë presionit ndërkombëtar dhe u rikthye në Kosovë ku përfundoi studimet dhe u angazhua në shoqërinë civile para se të niste organizimin e lëvizjes Vetëvendosje.
Dorëheqja e tij si kryetar i lëvizjes dhe partisë që ai vetë themeloi është një akt simbolik i rëndësishëm për politikën shqiptare në Shqipëri, Kosovë apo Maqedoni, ku dorëheqjet e udhëheqësve të partive kanë qenë të rralla që nga koha e themelimit të sistemeve politike pluraliste në këto vende.
