Të shqetësuar nga problemet që kanë hasur kredimarrësit me kredi në franga, Rumania po punon për miratimin e një ligji që do t’i ndihmojë ata të vetëshpallen të falimentuar.
Një komision parlamentar në Rumani po debaton një projektligj për falimentin personal, i hartuar për të ndihmuar kredimarrësit t’i shpëtojnë kredive që kanë marrë në franga zvicerane dhe që tashmë janë bërë tepër të shtrenjta për t’u përballuar.
Sapo komisioni të miratojë projektligjin, parlamenti do të mblidhet për ta diskutuar këtë ligji, deklaroi Valeriu Zgonea, zëdhënës i dhomës së dytë të parlamentit, Camera Deputatilor, tha të martën.
Autoritetet janë të shqetësuara se rritja e shpejtë e vlerës së frangës zvicerane përballë monedhës vendëse po i çon mijëra njerëz që kanë kredi në franga drejt pamundësisë financiare.
Presidenti Klaus Iohannis u takua dje me kryeministrin Victor Ponta për të diskutuar këtë problem, i cili ka prekur një numër të madh vendesh ku bankat kanë ofruar gjatë viteve të fundit kredi me norma më të ulëta interesi në franga, por që kishin edhe shkallë rreziku më të lartë.
Ponta të hënën tha se qe i hapur për të diskutuar idenë e konvertimit të kredive në franka në kredi në monedhën vendëse lei.
Një projektligj synon të konvertojë kreditë në franga në kredi në lei me një kurs fiks këmbimi. Ai ka qenë në shqyrtim gjatë muajve të fundit por bankat vendëse e patën kundërshtuar idenë.
Disa banka kanë njoftuar se do të ndërmarrin masa më nënyrë private për të mbështetur klientët e tyre. Volksbank Romania të hënën vendosi të ngrijë kursin e këmbimit të frangës për klientët e vet në një nivel 17 për qind më të ulët se sa kursi mesatar i këmbimit i shpallur nga banka qëndrore e Rumanisë më 19 janar.
Vlera e frangës zvicerane u rrit me 30 për qind kundrejt euros brenda një dite pasi banka Qëndrore e Zvicrës vendosi të braktisë tavanin që kishte përcaktuar vetë në kursin e këmbimit mes frangës dhe euros.
Rreth 75 mijë deri në 100 mijë kredimarrës në Rumani janë përballur me shtrenjtim në masën 30 për qind të kësteve të kredve të tyre që i kanë marrë për të blerë makina apo shtëpi në franga zvicerane.
Vlerësohet se sasia e kredive në franga zvicerane në Rumani është ekujvalenti i 1.8 miliardë eurove, rreth 4 për qind të totalit të kredive.
Disa klientë kanë kërcënuar se do të bojkotojnë shlyerjen e rregullt të kësteve të tyre.
Ndërsa politikanët kërkojnë zgjidhje për këtë situatë, zyrtarët e bankës qëndrore të vendit janë më pak të shqetësuar.
“Shkalla e ekspozimit të Rumanisë ndaj monedhës zvicerane është relativisht e vogël – jo më shumë se 6 deri në 8 për qind të kredive të dhëna vitin e kaluar,” deklaroi Adrian Vasilescu, një këshilltar i guvernatorit të bankës qëndrore në një intervistë.
Ai shtoi se niveli relativisht i ulët i kredive në franga në Rumani qe si pasojë e ndërhyrjes me rregullore të bankës qëndrore gjatë viteve të fundit.
Falimenti personal është një procedurë ligjore në të cilën dikush shpall veten në pamundësi financiare për të shlyer borxhet.
Avantazhet e falimentit janë që borxhi mund të mos paguhet ose mund të paguhet më vonë me afate më të gjata shlyerje në bazë të të ardhurave.
Falimenti personal është i ligjshëm në shumë vende të Europës Perëndimore si dhe në Shtetet e Bashkuara e Kanada.