Të premten në Gjykatën Themelore në Prishtinë u mbajt seanca fillestare kundër Fitim Lladrovcit, gjatë së cilës ai u shpall fajtor për organizim ose pjesëmarrje në grup terrorist dhe për armëmbajtje pa leje.
Në gjykatë pasi iu lexua aktakuza Lladrovci u pyet nga gjyqtari i rastit Faik Hoxha se a i ka kuptuar akuzat dhe a e ndien veten fajtor.
Lladrovci u deklarua se e ka të qartë aktakuzën, ndërsa tha se ndihet fajtor për veprat penale me të cilat ngarkohet.
Pas pranimit të fajësisë nga ana e të akuzuarit, gjyqtari Hoxha shpalli vendimin e gjykatës duke e dënuar Fitim Lladrovcin me 5 vjet burg.
Masa e dënimit e befasoi Nuhi Paçarizin, avokatin e Lladrovcit.
“Unë si mbrojtës, e po ashtu edhe familja e te akuzuarit, jemi befasuar me këtë vendim te gjykatës, andaj ne këtë vendim do ta apelojmë ne Gjykatën e Apelit “ deklaroi Paçarizi për portalin Kallxo.com.
Avokati tha se Lladrovci ishte nga ata që sollën në Kosovë fëmijën Erion Zena.
“Mendoj se është një dënim i lartë sa i përket dënimit për terrorizëm, pasi që i mbrojturi im ka rrezikuar jetën për ta sjellë nga Siria në Kosovë fëmiun Erion Zena dhe me këtë veprim i mbrojturi im nga Organizata ISIS është shpallur tradhtar dhe për kokën e tij kjo organizatë ka ofruar shpërblim,“ tha Paçarizi.
Zena ishte marrë në Siri nga babai i tij që kishte shkuar atje për të luftuar në korrik 2014, ndërsa ishte kthyer në tetor te mamaja në Kosovë.
Fitim Lladrovci akuzohej nga Prokuroria Speciale e Republikës së Kosovës se disa herë udhëtoi drejt Sirisë gjatë viteve 2013-2024 për t’iu bashkuar organizatave terroriste “ISIS” dhe “Al-Nusra”.
I pandehuri Fitim Lladrovci me pseudonimin “Fita”, më datën 8 dhjetor 2013 ka udhëtuar nga Aeroporti Ndërkombëtar i Prishtinës “Adem Jashari” për në Stamboll, prej nga me automjete të ndryshme ka shkuar në një qytet afër Aleppos, në Republikën Arabe të Sirisë, ku më dashje iu është bashkuar organizatave terroriste “ISIS” dhe “Al – Nusra, thuhej në aktakuzën kundër Lladrovcit.
Sipas prokurorisë herën e parë Lladrovci në shtetin e përfshirë nga lufta civile qëndroi deri më 28 dhjetor 2013, për t’u kthyer përsëri me aeroplan në Aeroportin Ndërkombëtar “Adem Jashari’ në Sllatinë.
Prokuroria përshkruan edhe kohën kur pretendon se Lladrovci udhëtoi përsëri drejt Sirisë.
“Më 15 maj 2014, me aeroplan përmes Podgoricës ka udhëtuar për në Stamboll, ku pas tre ditësh ka arritur që të shkojë në qytetin Stereshin të Republikës Arabe të Sirisë, ku me dashje i është bashkëngjitur organizatës terroriste “ISIS”, ku ka qëndruar deri më 9 tetor 2014” vijon aktakuza.
Aktakuza tregon se më 15 tetor 2014 sërish përmes Aeroportit Ndërkombëtar “Adem Jashari” në Sllatinë, Lladrovci është kthyer në Republikën e Kosovës.
Me këto udhëtime dhe qëndrim në Siri prokuroria thotë se Lladrovci ka kryer veprën penale: Organizim ose pjesëmarrja në grup terrorist nga neni 143 paragrafi 2 i Kodit Penal të Republikës së Kosovës.
Te Lladrovci janë gjetur edhe armë gjatë bastisjes.
“Gjatë bastisjes së shtëpisë se tij nga Policia e Kosovës, të pandehurit i është gjetur duke mbajtur në pronësi dhe kontroll në mënyrë të paautorizuar një raketahedhës dore Zolja me nr. 8706291M 80-64 mm, si dhe një pistoletë e markës “TT” M 57 cal. 7.62 mm, me 8 fishekë,” shpjegon komunikata.
Prokuroria sqaron se për këto armë të gjetura Lladrovci sipas saj ka kryer veprën penale mbajtje në pronësi, kontroll ose posedim të paautorizuar të armëve nga neni 374 par. 1 i Kodit Penal të Republikës së Kosovës.
Marrë nga Kallxo.com