Policia u përgjigj duke përdorur gaz lotsjellës, ndërsa më shumë se 2,000 njerëz protestuan në Prishtinë për shkarkimin e ministrit serb Aleksandar Jablanoviç, i cili akuzohet se ka ofenduar viktimat shqiptare të luftës.
Policia e pranishme në protestë përdori gaz lotsjellës ditën e martë gjatë protestave të fundit për shkarkimin Jablanoviçit pasi protestuesit larguan me dhunë një barrikadë, e cila shërbente për t’i parandaluar ata të hynin në sheshin qendror Skëndërbeu, pranë ndërtesës së qeverisë në Prishtinë.
Akoma më shumë gaz dhe ujë u përdor, ndërsa radhët e policëve me skafandra përpiqeshin të mos lejonin grupin e demonstruesve t’i afrohej ndërtesës së qeverisë. Qyteti u mbulua nga re gazi lotsjellës, ndërsa rrugët ishin të rrethuara për të mos lejuar rigrupimin e protestuesve.
Protestuesit mbanin flamuj shqiptarë dhe thërrisnin “Poshtë qeveria” dhe “Largoni Jablanoviçin!” në protestën e organizuar nga partia nacionaliste Vetëvendosja dhe u mbështet nga partitë e tjera opozitare. Por fjalimet e liderëve të Vetëvendosjes u anuluan për shkak të trazirave.
Jablanoviç, Ministri për Komunitetet dhe të Rikthyerit, shkaktoi zemërim kur më herët këtë muaj ai i përshkroi si “njerëz të egër” shqiptarët që nuk i lejuan pelegrinët serbë të vizitonin një kishë në Gjakovë gjatë Krishtlindjes Ortodokse.
“Jam këtu duke protestuar për largimin e ministrit serb Jablanoviç, i cili ofendoi nënat kosovare dhe të gjithë ne,” tha Kushtrim Ramadani, një nga protestuesit, për BIRN.
“Ne po protestojnë për të mbrojtur dinjitetin dhe integritetin e vendit tonë,” tha Donika Kadaj Bujupi, një deputete nga Aleanca për Ardhmërinë e Kosovës.
Tubimi pasoi një protestë shumë më të madhe që u organizua ditën e shtunën dhe përfundoi në përplasje me policinë në Prishtinë, pasi disa demonstrues qëlluan me gurë ndërtesën e qeverisë.
Megjithatë, qeveria hodhi poshtë një ultimatum të opozitës për të shkarkuar Jablanoviçin brenda 48 orëve.
“Qeveria e Kosovës i bën thirrje partive politike dhe liderëve të tyre për të përmbushur qëllimet dhe ambiciet e tyre politike përmes zgjedhjeve të lira dhe demokratike, dhe të mos përdorin pretekste të ndryshme për të arritur qëllimet politike në mënyrë jodemokratike,” tha kryeministri Isa Mustafa një takim të qeverisë.
Mustafa tha se ai e respekton të drejtën për të protestuar si shprehje e “mendimit dhe shqetësimeve civile”, por përveç kësaj, Kosova ka pasur probleme të tjera, si për shembull papunësi, varfëri, korrupsion dhe krim të organizuar që duhet të jenë më shumë prioritet.
Jablanoviç është një nga tre ministrat serbë në kabinetin qeveritar të kryeministrit Isa Mustafa. Ai ka kërkuar ndjesë për deklaratën e tij për incidentin në Gjakovë, duke u shprehur se nuk ishte në dijeni të asaj që kishte ndodhur atje gjatë luftës.
Gjakova ishte skenë luftimesh të ashpra dhe pati shumë të vdekur gjatë konfliktit mes forcave jugosllave dhe Ushtrisë Çlirimtare të Kosovës.
Përveç shkarkimit të Jablanoviçit, protestuesit bënë thirrje gjithashtu që kompleksi i minierës së Trepçës të merrej nën kontroll të Kosovës, një temë kjo debati mes Prishtinës dhe Beogradit.
Votimi për këtë çështje në Parlamentin e Kosovës u shty për ditën e hënë pas presionit nga Beogradi, duke bërë që protestuesit të shpërthenin në zemërim kundër kryemonistrit Isa Mustafa, të cilin e akuzuan se po i dorëzohej Serbisë.