Foto: BIRN
Qeveria e Kosovës akuzoi liderët e opozitës se u përpoqën të merrnin pushtetin duke përdorur dhunë pas përleshjeve të protestës në Prishtinë, ku mbetën të plagosur më shumë se 170 persona, ndërsa opozita fajësoi policinë.
Foto: BIRN
Qeveria dhe opozita kanë fajësuar njëra-tjetrën për gjashtë orët e trazirave pranë ndërtesës së qeverisë gjatë protestave në qendër të Prishtinës ditën e martë, ku u arrestuan 120 persona.
Spitali kryesor i Prishtinës tha se 107 policë, 53 protestues dhe 10 të tjerë u plagosën në mes të skenave të dhunshme, ku demonstruesit qëlluan me gurë dhe koktejl molotov ndaj policisë, e cila përdori gaz lotsjellës dhe ujë në një përpjekje për të shuar trazirat.
Kryeministri i Kosovës Isa Mustafa dhe zëvendësi i tij, Hashim Thaçi, pretendojnë se partitë e opozitës që organizuan protestën po përpiqeshin të merrnin pushtetin.
“Qeveria e Republikës së Kosovës beson se protestat nuk duhet të përdoren për të arritur ambicie për pushtet, sepse pushteti fitohet vetëm përmes një votimi të lirë nga qytetarët e Kosovës, jo me anë të forcës dhe,” tha Mustafa.
Ai pohoi se protestuesit, të cilët kërkonin shkarkimin e ministrit serb i Kosovës Aleksandar Jablanoviç, i cili akuzohet se ka ofenduar shqiptarët etnik viktima të luftës, po manipuloheshin nga opozita.
“Qeveria dënon përdorimin e protestuesve dhe studentëve në protestën për qëllime politike nga organizatorët,” tha ai.
Por Albin Kurti, lideri i Lëvizjes Vetëvendosja, e cila organizoi tubimin së bashku me parti të tjera të opozitës, këmbënguli se protesta ishte paqësore derisa ndërhyri policia dhe shkaktoi dhunën.
Kurti tha se opozita nuk do të heqë dorë nga kërkesa e saj për dorëheqjen e Ministrit të Komuniteteve dhe të Rikthyerve Jablanoviç,i cili shkaktoi zemërim në fillim të këtij muaji kur i quajti “njerëz të egër” shqiptarët që bllokuan pelegrinët serbë që po shkonin të vizitonin një kishë në qytetin e Gjakovës gjatë Krishtlindjes Ortodokse.
“Protestat do të vazhdojnë me kërkesa të njëjta. Kjo është një çështje ditësh, jo javësh apo muajsh, derisa të mbahet protesta e ardhshme,” tha Kurti në një konferencë për shtyp.
Partitë e opozitës kanë dy kërkesa: shkarkimin e Jablanoviçit dhe kompleksin e madh të minierës së Trepçës, çështje debati mes Prishtinës dhe Beogradit, e cila duhet të merret nën kontrollin e shtetit të Kosovës.
Partitë opozitare u zemëruan shumë kur qeveria tërhoqi një pjesë të projektligjit, i cili kishte për qëllim ta shndërronte Trepçën në një ndërmarrje publike, nga parlamenti më 19 janar.
Ramush Haradinaj, lideri i partisë opozitare Aleanca për Ardhmërinë e Kosovës (AAK), e cila ishte gjithashtu e përfshirë në protestën e së martës, këmbënguli gjithashtu se demonstratat do të vazhdojnë.
“Njerëzit do të vazhdojnë të protestojnë derisa të drejtat e tyre të plotësohen,” tha në faqen e tij në Facebook Haradinaj.
Ambasadorja amerikane në Prishtinë, Tracey Ann Jacobson, tha se protesta publike ishte një e drejtë demokratike, por dënoi dhunën.
“Shkatërrimi i pronës publike dhe private është një akt kriminal,” shkroi Jacobson Twitter.
Misioni i OSBE-së në Kosovë gjithashtu shprehu shqetësim rreth trazirave.
“Njerëzit kanë të drejtë të protestojnë, por ata duhet t’i shprehin në mënyrë paqësore ankesat e tyre. Dhuna nuk është përgjigja e duhur,” tha ambasadori i OSBE-së Jean-Claude Schlumberger.
