I pandehuri serb për krime luftë Vojisllav Sheshel e ka quajtur kryeprokurorin e Hagës ‘kukull’ dhe e akuzoi atë se ka marrë 500, 000 euro ryshfet nga qeveria kroate.
Udhëheqësi i Partisë Radikale Serbe, Vojisllav Sheshel i ka paraqitur një mocion gjyqtarëve të Hagës ku akuzon kryeprokurorin e gjykatës së Hagës se ka marë ryshfet dhe se është thjesht një ‘kukull’.
“Bramertz e pranoi shpërblimin nga autoritetet kroate për të bërë gjithçka mundte për të kthyer në burg në Hagë dr.Vojisllav Sheshelin,” shprehet Shesheli.
“Ai mori prej tyre një shpërblim prej 500,000 eurosh dhe pranoi rolin e kukullës. Është diçka e keqe dhe e palejueshme që kryeprokurori të shkelë të gjitha parimet morale dhe ta vërë veten në shërbim të të gjithë atyre që nuk i pëlqejnë pikëpamjet politike liridashëse të Sheshelit,” thuhet në mocionin e paraqitur gjykatësve të Hagës.
Lideri i Partisë Radikale e paraqiti mocionin e tij në përgjigje të Brammertz, i cili kërkoi revokimin e lirimit të përkohshëm të Sheshelit për shkak “të deklaratave të tij të papranueshme publike, të cilat janë nxitëse dhe ofenduese për komunitetet e viktimave”.
Shefi Radikal Serb në përgjigje i ka kërkuar gjykatës së Hagës “të nxisë masat disiplinore” kundër Bramertz, i cili “po sillet si një pallua që mendon se një prokurori mund t’i lejohet të sillet si një politikan që mund t’i japë leksione të gjithëve”.
Gjykata urdhëroi lirimin e përkohshëm Sheshelit në nëntor të vitit të kaluar për arsye humanitare, për shkak të shëndetit të tij të dobët.
Megjithatë, që kur u kthye në Beograd, ai ka udhëhequr protesta nacionaliste dhe ka bërë një sërë deklaratash nxitëse që kanë zemëruar viktimat e luftërave në ish-Jugosllavi si dhe qeveritë fqinje.
Ai ka thënë gjithashtu se nuk do të kthehet vullnetarisht në gjykatën e Hagës për të përfunduar gjyqin e tij.
Brammertz kërkoi revokimin e lirimit të përkohshëm të Sheshelit në dhjetor, por gjykata e refuzoi këtë gjë, duke arritur në përfundimin se Shesheli “nuk kishte shkelur rregullat e lirimit të tij”, pas të cilës Brammertz paraqiti ankesën e tij.
Parlamenti Evropian si edhe autoritetet kroate i kanë kërkuar Gjykatës së Hagës të rishohë vendimin e saj për lirimin e përkohshëm të Sheshelit.
Shesheli ka qenë në paraburgim që nga viti 2003, kur ai u doëzua vullnetarisht në gjykatën e Hagës.
Vendimi për çështjen e tij ishte planifikuar të merrej në tetor të vitit 2013, por u shty pasi një prej gjyqtarëve në gjyqin e tij u shkarkuar nga çështja se dyshohej për njëanshmëri.
Gjyqtari i ri pritet të marrë kohë deri në fund të qershorit për t’u njohur nga afër me çështjen, duke shkaktuar edhe një tjetër vonesë në gjyqin maratonë.
