Mijëra punonjës me kontratë dhe të punësuar të rastit protestuan në Shkup për herë të dytë të premten kundër një rritje të ashpër të taksave të tyre nga 10 në 35 për qind.
Përkthyes, muzikantë, punonjës në sektorin e OJQ-ve, gazetarë të pavarur dhe shumë të tjerë mbështetur nga disa sindikata punonjësish dhe lëvizje të të drejtave, protestuan të premten në Shkup kundër rritjes së një takse, që hyri në fuqi që nga janari, të cilën ata e quajnë ‘një mashtrim shtetëror’.
“Ne nuk do të heqim dorë derisa ju të shfuqizoni ligjin” bërtitën protestuesit gjatë marshimit që filloi përpara parlamentit, kaloi në Ministrinë e Punës dhe vazhdoi në ndërtesën qeveritare në qendër të Shkupit.
Punonjësit mbanin pankarta ku lexohej “Të drejtat e punëtorëve”, “Do të dëgjojnë prej nesh!”, “Kjo është luftë klasash” dhe “Qeveria Mafia dhe Mashtrues”.
Marshimi mori fund pranë kampusit të universitetit shtetëror pas të cilit ata u tubuan jashtë universitetit për të shprehur solidaritet me studentët protestues, të cilët të mërkurën zaptuan kompleksin dhe e shpallën atë ‘territor autonom’.
Studentët që po i kalojnë netët në universitet po protestojnë kundër ligjit të ri të arsimit të lartë, që imponon provime të jashtme të mbikëqyrura nga shteti, të cilat studentët thonë se prekin autonominë e universitetit.
“Dy kauzat tona janë të lidhura dhe solidariteti juaj vlerësohet shumë,” tha një përfaqësues i studentëve te punëtorët e mbledhur.
Reforma e taksave, që hyri në fuqi këtë vit të ri, i detyron punonjësit me kontrata të paracaktuara dhe punonjësit e rastit të paguajnë 35 për qind të fitimeve për shëndet dhe mirëqenie, sikur të ishin të punësuar rregullisht.
Qeveria këmbënguli se reforma do të ulte numrin e papunësisë dhe se rriste sigurinë shoqërore të punëtorëve. Protestuesit thonë se është një përpjekje për të marrë para nga njerëzit që shpesh fitojnë vetëm 200 deri në 400 euro në muaj dhe kjo do t’i bëjë ata më të varfër.
Protestuesit thonë se 200,000 njerëz në vendin prej 2.1 milionë mund të ndikohen drejtpërdrejt nga ndryshimi.
Pas protestës së parë në dhjetor, qeveria e kryeministrit Nikola Gruevski fillimisht nuk tregoi shenja tërheqje.
Megjithatë, në një përpjekje për të qetësuar punëtorët me kontratë në protestë, partia në qeverisje VMRO DPMNE ofroi të miratonte disa ndryshime për të lehtësuar rritjen e taksës, që e bënë këtë javë.
Ndryshimet e miratuara këtë javë parashikojnë se ata në punë që fitojnë edhe prej kontratave shtesë janë të përjashtuar nga pagesa e taksave për fitimet shtesë nëse nuk e kalojnë pagën mesatare mujore prej 340 euro.
Të papunët janë të përjashtuar nga pagesa e taksave shtesë nëse fitimet e tyre mujore nga kontratat nuk e kalojnë minimumin e pagës mujore prej 150 euro.
Megjithatë, bashkimi i lëvizjeve për të drejtat e punëtorëve dhe sindikatat mbetën të pakënaqura, duke thënë se së bashku duan ta heqin këtë ligj.